ەلوردالىق قازاقستان حالقى اسسامبلەياسى دوستىق ءۇيىنىڭ بازاسىندا سۋ تاسقىنىنان زارداپ شەككەن وڭىرلەردىڭ تۇرعىندارى ءۇشىن گۋمانيتارلىق كومەك جيناۋ بويىنشا الەۋمەتتىك اكتسيا ۇيىمداستىردى، دەپ حابارلايدى “ادىرنا” ۇلتتىق پورتالى استانا اكىمدىگىنىڭ رەسمي سايتى سىلتەپ.
گۋمانيتارلىق كومەك اقمولا جانە قاراعاندى وبلىستارىنىڭ تۇرعىندارىنا جەتكىزىلەدى. زارداپ شەككەندەرگە كيىم-كەشەك، ازىق-تۇلىك، جەكە كۇتىم، توسەك-ورىن، ىدىس-اياق جانە ءدارى-دارمەكتەر جينالدى.
حاسان شاريپوۆتىڭ توراعالىعىمەن قۇرىلعان قالالىق شتاب گۋمانيتارلىق كومەك جيناۋ جۇمىستارىن ۇيلەستىرەدى جانە تاۋارلاردى قابىلداۋ مەن تۇسىرۋگە كومەك كورسەتەدى.
ء"بىز قازاقستان حالقى اسسامبلەياسى مەن ەتنومادەني ورتالىقتاردىڭ اتىنان سۋ تاسقىنىنان زارداپ شەككەندەرگە قولداۋ كورسەتەمىز. وڭىرلەردە توتەنشە جاعداي جاريالانعاننان كەيىن ءبىز گۋمانيتارلىق كومەك جينادىق", - دەپ اتاپ ءوتتى قالالىق شتاب توراعاسى جانە قحا مۇشەسى حاسان شاريپوۆ.
اكتسياعا ەلوردا تۇرعىندارى، قحا جاستار قاناتىنىڭ ەرىكتىلەرى مەن مەتسەناتتار قاتىستى. سونداي-اق ازىق-تۇلىك جەتكىزگەن "استانا" بالالار فۋتبول كلۋبىنىڭ مۇشەلەرى كومەككە ماڭىزدى ۇلەس قوستى.
قازىرگى ۋاقىتتا قالا اسسامبلەياسىنىڭ مۇشەلەرى مەن ەرىكتىلەر سۋ تاسقىنىنان زارداپ شەككەندەرگە جالپى سوماسى 5 ملن 200 تەڭگەگە كومەك كورسەتتى.
ەستەرىڭىزگە سالا كەتەيىك، استانادا گۋمانيتارلىق كومەك قابىلداۋدىڭ 9 پۋنكتى ۇيىمداستىرىلىپ، جيىنى 30-عا جۋىق ەرىكتىلەر ۇيىمى قاتىسۋدا. كۇن سايىن 200-دەن استام ەرىكتى قاجەتتى زاتتاردى سۇرىپتاۋعا جانە جونەلتۋگە كومەك كورسەتەدى.
ايتا كەتۋ كەرەك، ەرىكتىلەر قارجىلىق كومەكتى قابىلدامايدى. نيەت بىلدىرۋشىلەر جيناۋ ورىندارىنا قاجەتتى ونىمدەردى جيناپ، اپارا الادى.
