مەملەكەت باسشىسى سولتۇستىك قازاقستان وبلىسىنا جۇمىس ساپارىمەن باردى، دەپ حابارلايدى "ادىرنا" ءتىلشىسى اقورداعا سىلتەپ.
پرەزيدەنت قاسىم-جومارت توقاەۆتىڭ جۇمىس ساپارى بارىسىندا سەرگەەۆكا سۋ قويماسىن، قىزىلجار اۋدانىن جانە پەتروپاۆل قالاسىنىڭ توڭىرەگىن تىكۇشاقپەن ارالادى.
سولتۇستىك قازاقستان وبلىسىنىڭ اكىمى عاۋەز نۇرمۇحامبەتوۆ مەملەكەت باسشىسىنا ايماقتاعى قىزىلجار، ەسىل، شال اقىن اۋداندارى مەن پەتروپاۆل قالاسىنداعى سۋ تاسقىنى جاعدايىن باياندادى.
اكىمنىڭ ايتۋىنشا، التى اۋداندا توتەنشە جاعداي جاريالانعان. قازىرگى تاڭدا 2 مىڭنان استام تۇرعىن ءۇيدى سۋ باسىپ، 10345 ادام ەۆاكۋاتسيالانعان. ال سۋ تاسقىنىنا قارسى شارالارعا 5270 ادام جانە 906 تەحنيكا جۇمىلدىرىلعان.
قازىر ايماقتا حالىقتىڭ تۇرمىس-تىرشىلىگىنە قاجەتتى ينفراقۇرىلىمداردى قالپىنا كەلتىرۋ جۇمىستارى جۇرگىزىلىپ جاتىر.
ودان بولەك، تابيعي اپاتتان زارداپ شەككەن ازاماتتاردىڭ ماتەريالدىق شىعىندارىن ەسەپتەۋ جانە وتەۋ جونىندە كوميسسيا قۇرىلعان.
