مەملەكەت باسشىسى قاسىم-جومارت توقاەۆ الماتى قالاسى جۇرتشىلىعىمەن كەزدەسۋى بارىسىندا جاستار ءۇشىن ەڭ وزەكتى ماسەلە باسپانا ەكەنىنە باسا اۋداردى، دەپ حابارلايدى «ادىرنا» ءتىلشىسى.
«الماتى تۇرعىندارىنىڭ كوپشىلىگى، اسىرەسە، جاستار ءۇشىن باسپانا – ەڭ وزەكتى ماسەلە. قالادا پاتەردىڭ باعاسى تىم جوعارى. ارينە، ەڭبەك جولىن ەندى عانا باستاعان جاستار بىردەن پاتەر ساتىپ الا المايتىنى تۇسىنىكتى. بىراق، سولاي ەكەن دەپ ەش قارەكەتسىز قول قۋسىرىپ وتىرۋعا بولمايدى. جاستاردىڭ باسپانا الۋىنا جان-جاقتى جاعداي جاساۋ كەرەك. بۇل – مەملەكەتتىڭ باستى مىندەتىنىڭ ءبىرى. اكىمدىك جالعا بەرىلەتىن تۇرعىن-ءۇي سالۋ ءۇشىن ينۆەستورلارعا تارتىمدى بولاتىن ءتيىمدى تاسىلدەر ويلاستىرۋعا ءتيىس. بىراق جالدامالى ۇيلەر تىم قىمباتقا تۇسپەۋى كەرەك. ونداي پاتەرلەر، ەڭ الدىمەن، قولجەتىمدى بولۋعا ءتيىس. جالپى، الماتى جاستارى ءۇشىن باسپانالى بولۋ قول جەتپەس ارمان بولماۋى كەرەك. باسىندا باسپاناسى بار جاستاردىڭ ەرتەڭگى كۇنگە دەگەن سەنىمى ارتادى», - دەدى قاسىم-جومارت توقاەۆ.
مەملەكەت باسشىسى قالادا تۇرعىن-ءۇي تاپشىلىعىن ازايتۋ اسا ماڭىزدى مىندەت ەكەنىن ايتا كەلە، شاھار باسشىلىعىنا تاپسىرما بەردى.
«كەلەسى جىلدان باستاپ تۇرعىن-ءۇي قۇرىلىسىن جىل سايىن 10 پايىزعا ارتتىرۋ قاجەت. ارينە، الماتىدا بوس جەر از. بۇل جاعداي قۇرىلىستىڭ قارقىنىن كۇشەيتۋگە كەدەرگى كەلتىرۋى مۇمكىن. سول سەبەپتى، جاڭا جەرلەردى يگەرۋ كەرەك. قالادا 1500-گە جۋىق ەسكى ءۇي بار. شاعىن اۋدانداردا تۇرعان مۇنداي ۇيلەرگە كۇردەلى جوندەۋ جۇرگىزگەن ءجون. ال جاڭعىرتۋعا كەلمەيتىندەرىن ءسۇرىپ تاستاۋ قاجەت. اكىمدىككە وسى شارۋانى كەزەڭ-كەزەڭمەن جۇزەگە اسىرۋ ءۇشىن ناقتى جوسپار ازىرلەۋدى تاپسىرامىن. جاڭعىرتۋ جۇمىستارىنىڭ تۇرعىندارعا قولايسىزدىق تۋدىرماۋىن ويلاستىرۋ كەرەك»، - دەدى ول.
كەزدەسۋ كەزىندە توقاەۆ ەلدىڭ نارازىلىعىن تۋدىراتىن تاعى ءبىر ماڭىزدى ماسەلە - ۇيلەردىڭ تىعىز ورنالاسۋىنا توقتالدى.
«وسىنداي قۇرىلىستار جانە جولداردىڭ ىڭعايسىز سالىنۋى كوپ قولايسىزدىق تۋدىرىپ وتىر. الماتى زاماناۋي ۋربانيستيكا تالاپتارىنا ساي بولۋى كەرەك. قالامىز بەتوننان سالىنعان ورمانعا اينالماۋعا ءتيىس. سونداي-اق، الاتاۋدىڭ سامالى قالادا ەركىن ەسۋى قاجەت. بۇل قالانىڭ ەكولوگياسى ءۇشىن وتە ماڭىزدى. قالا سالۋ كەزىندە قۇرىلىس كومپانيالارىنىڭ ەمەس، ەڭ الدىمەن، تۇرعىنداردىڭ مۇددەسى ەسكەرىلۋى كەرەك. زاڭدارىمىزدا بۇل جاعداي ناقتى رەتتەلمەگەن. ۇكىمەتكە اكىمدىكپەن بىرلەسىپ، وسى ماسەلەنى پىسىقتاپ، زاڭعا ءتيىستى تۇزەتۋلەر ازىرلەۋدى تاپسىرامىن»،-دەدى پرەزيدەنت.
مۇنىڭ ءبارى الماتىنى مەيلىنشە جايلى، قولايلى قالا رەتىندە ودان ءارى دامىتۋ ءۇشىن قاجەت شارالار. مەملەكەت باسشىسى، جايلى قالا بولۋى ءۇشىن «شاھاردا بوتانيكالىق باق سياقتى قوعامدىق ورىندار كوپ بولۋعا ءتيىس», دەدى.
ايتۋىنشا، كەيبىر اۋدانداردا وسىنداي نىساندار مۇلدەم جوق.
«قالا اكىمدىگى وسى احۋالدى تۇبەگەيلى وزگەرتۋدى كوزدەپ وتىر. جۇرتتىڭ دەمالۋىنا ارنالعان بەس ورتالىق سالۋ جوسپاردا بار. مەن مۇنى تولىق قولدايمىن. بىراق، جۇمىستى ساپالى ورىنداۋ قاجەت»، -دەپ قورىتىندىلادى ول.
