باتىس قازاقستان ءوڭىرى سۋ تاسقىنىنىڭ ەكىنشى كەزەڭىنە دايىندالىپ جاتىر، دەپ حابارلايدى "ادىرنا" ءتىلشىسى.
سۋ تاسقىنى باستالعالى وبلىستان 13 159 ادام ەۆاكۋاتسيالاندى، ونىڭ ىشىندە 6 مىڭعا جۋىعى بالالار.
وبلىس بويىنشا 17 ەۆاكۋاتسيالىق پۋنكتكە 1 701 ادام ورنالاسقان. بۇل تۋرالى
«قازىرگى ۋاقىتتا سۋ تاسقىنىنىڭ ەكىنشى كەزەڭىنە دايىندىق جۇرگىزىلۋدە. جاعداي ءالى دە كۇردەلى بولىپ قالۋدا. سەبەبى، رەسەيدىڭ ورىنبور وبلىسىنان كەلە جاتقان سۋلار 17-19 ساۋىردە وبلىسقا كەلەدى دەگەن بولجام بار. قازىرگى كەزدە جايىق وزەنىندەگى سۋ دەڭگەيى 759 سم قۇرادى. ياعني، قاۋىپتى دەڭگەيگە جەتىپ قالدى، ول 850 سم قۇرايدى. وسىعان بايلانىستى 80 كم جۋىق بوگەت تۇرعىزىلىپ، جايىق وزەنىنىڭ جاعاسى بارىنشا نىعايتىلۋدا. قازىرگى ۋاقىتتا اقجايىق، ءبورلى، بايتەرەك، تەرەكتى اۋداندارى مەن ورال قالاسىن سۋ باسۋ قاۋپى بار»، - دەدى وبلىس اكىمىنىڭ ءباسپاسوز قىزمەتىنىڭ باسشىسى ەرحان تاتكەن رەسپۋبليكالىق اقپاراتتىق شتابتا وتكەن بريفينگتە.
ونىڭ ايتۋىنشا، سۋ تاسقىنىنان زارداپ شەككەن 677 وتباسىعا 125 ملن تەڭگە قارجى تولەندى. سونداي-اق قايىرىمدىلىق قورلار، كاسىپكەرلەر، جەكە تۇلعالار تاراپىنان 279 ملن تەڭگە كولەمىندە گۋمانيتارلىق كومەك كورسەتىلدى.
