12 ءساۋىر – عىلىم قىزمەتكەرلەرى كۇنى. سونىمەن بىرگە قازاق عىلىم اكادەمياسىنىڭ نەگىزىن سالۋشى، عۇلاما عالىم، اكادەميك قانىش يمانتايۇلى ساتباەۆتىڭ تۋعان كۇنى. بيىل قانىش يمانتايۇلىنىڭ مەرەيتويى – 125 جىلدىعى. ەلىمىز كولەمىندە ق.ي. ساتباەۆتىڭ مەرەيتويى كەڭىنەن اتالىپ وتىلۋدە.
قازىرگى قوعامدىق گۋمانيتارلىق بەيىندەگى عىلىمي-زەرتتەۋ ينستيتۋتتارىنىڭ باسىم بولىگى ق.ي. ساتباەۆتىڭ كورەگەندىك ساياساتى نەگىزىندە اشىلدى. شىعىستانۋ ينستيتۋتى تاۋەلسىزدىك جىلدارى قۇرىلسا دا، شىعىستانۋ زەرتتەۋلەرىنىڭ العىشارتتارى عىلىم اكادەمياسىنىڭ العاشقى جىلدارى پايدا بولدى. سول كەزدەرى قازاق حالقىنا قاتىستى شىعىس دەرەككوزدەرى زەرتتەلە باستالدى، العاشقى عىلىمي ەڭبەكتەر جازىلدى.
بۇگىنگى تاڭدا ينستيتۋت اكادەميك ر.ب. سۇلەيمەنوۆتىڭ ەسىمىمەن اتالعانى، ساتباەۆ مەكتەبىنىڭ جالعاسى دەپ ءبىلۋ كەرەك. ويتكەنى رامازان بيماشۇلى — جازۋشى، اكادەميك مۇحتار اۋەزوۆتىڭ شاكىرتى. ال ساتباەۆ پەن اۋەزوۆ رۋحاني جاعىنان سىرلاس، ارىپتەس بولدى، ءارى قازاق ەلىنىڭ مۇڭ-مۇقتاجىن تەرەڭ تۇسىنگەن، بولاشاق ۇرپاق ءۇشىن ايانباي ەڭبەك ەتكەن ءبىرتۋار تاۋ تۇلعالار ەدى. ساتباەۆتىڭ مەرەيتويى بارىمىزگە ورتاق – عىلىم تويى - بۇل ساتباەۆ كۇنى دەپ تۇسىنەمىز.
ر.ب. سۇلەيمەنوۆ اتىنداعى شىعىستانۋ ينستيتۋتىنىڭ باس ديرەكتورى، فيلول.ع.د.، پروفەسسور د.ءماسىمحانۇلىنىڭ شەشىمىمەن ينستيۋت قىزمەتكەرلەرى م.ق. ابۋسەيىتوۆا، ر.ۋ. كاريموۆا، د.ءا. ايتجانوۆا، د.ە. مەدەروۆا، ر.ق. يۋسۋپوۆ، ە.س. احمەتوۆ، ل.د. ابەنوۆا، ز.ك. كاريموۆا، ە.ق. بەلعوجا، گ.ۇ. سۇراشەۆا عىلىم سالاسىنداعى قاجىرلى ەڭبەگى مەن قول جەتكىزگەن جەتىستىكتەرى، سونداي-اق وتاندىق عىلىمدى دامىتۋعا ۇلەسى ءۇشىن 12 – ءساۋىر عىلىم قىزمەتكەرلەرىنىڭ كۇنىنە وراي قۇرمەت گراموتالارىمەن ماراپاتتالدى.
ر.ب. سۇلەيمەنوۆ اتىنداعى شىعىستانۋ ينستيتۋتى باس ديرەكتورىنىڭ عىلىم جونىندەگى ورىنباسارى، ە.ع.د. عالىمجان مۇستاحيمۇلى دۇيسەن گراموتالاردى سالتاناتتى تابىستاپ، «بارشاڭىزدى بۇگىنگى عىلىم قىزمەتكەرلەرى كۇنىمەن شىن جۇرەكتەن قۇتتىقتايمىن! دەندەرىڭىزگە ساۋلىق، جۇمىستارىڭىزعا تابىس، وتباستارىڭىزعا قۇت-بەرەكە تىلەيمىن! عىلىم جولىنداعى ەڭبەكتەرىڭىز جانا بەرسىن! مەرەكە قۇتتى بولسىن!»—دەگەن ىزگى تىلەگىن جەتكىزدى.