12 sáýir – Ǵylym qyzmetkerleri kúni. Sonymen birge Qazaq ǵylym akademııasynyń negizin salýshy, ǵulama ǵalym, akademık Qanysh Imantaıuly Sátbaevtyń týǵan kúni. Bıyl Qanysh Imantaıulynyń mereıtoıy – 125 jyldyǵy. Elimiz kóleminde Q.I. Sátbaevtyń mereıtoıy keńinen atalyp ótilýde.
Qazirgi qoǵamdyq gýmanıtarlyq beıindegi ǵylymı-zertteý ınstıtýttarynyń basym bóligi Q.I. Sátbaevtyń kóregendik saıasaty negizinde ashyldy. Shyǵystaný ınstıtýty táýelsizdik jyldary qurylsa da, shyǵystaný zertteýleriniń alǵysharttary ǵylym akademııasynyń alǵashqy jyldary paıda boldy. Sol kezderi qazaq halqyna qatysty shyǵys derekkózderi zerttele bastaldy, alǵashqy ǵylymı eńbekter jazyldy.
Búgingi tańda ınstıtýt akademık R.B. Súleımenovtyń esimimen atalǵany, Sátbaev mektebiniń jalǵasy dep bilý kerek. Óıtkeni Ramazan Bımashuly — jazýshy, akademık Muhtar Áýezovtyń shákirti. Al Sátbaev pen Áýezov rýhanı jaǵynan syrlas, áriptes boldy, ári qazaq eliniń muń-muqtajyn tereń túsingen, bolashaq urpaq úshin aıanbaı eńbek etken birtýar taý tulǵalar edi. Sátbaevtyń mereıtoıy bárimizge ortaq – ǵylym toıy - bul Sátbaev kúni dep túsinemiz.
R.B. Súleımenov atyndaǵy Shyǵystaný ınstıtýtynyń bas dırektory, fılol.ǵ.d., professor D.Másimhanulynyń sheshimimen Instıýt qyzmetkerleri M.Q. Ábýseıitova, R.Ý. Karımova, D.Á. Aıtjanova, D.E. Mederova, R.Q. Iýsýpov, E.S. Ahmetov, L.D. Ábenova, Z.K. Karımova, E.Q. Belǵoja, G.U. Surasheva ǵylym salasyndaǵy qajyrly eńbegi men qol jetkizgen jetistikteri, sondaı-aq otandyq ǵylymdy damytýǵa úlesi úshin 12 – sáýir ǵylym qyzmetkerleriniń kúnine oraı Qurmet gramotalarymen marapattaldy.
R.B. Súleımenov atyndaǵy Shyǵystaný ınstıtýty bas dırektorynyń ǵylym jónindegi orynbasary, e.ǵ.d. Ǵalymjan Mustahımuly Dúısen gramotalardy saltanatty tabystap, «Barshańyzdy búgingi Ǵylym qyzmetkerleri kúnimen shyn júrekten quttyqtaımyn! Denderińizge saýlyq, jumystaryńyzǵa tabys, otbastaryńyzǵa qut-bereke tileımin! Ǵylym jolyndaǵy eńbekterińiz jana bersin! Mereke qutty bolsyn!»—degen izgi tilegin jetkizdi.
