تاجىكستان پرەزيدەنتى ەمومالي راحمون ەلدى رامازان ايىنىڭ اياقتالۋىمەن قۇتتىقتادى، دەپ حابارلايدى "ادىرنا" ءتىلشىسى.
پرەزيدەنت كۇنى ەرتەڭ دۇنيە ءجۇزى مۇسىلماندارى قۇرمەت تۇتاتىن ورازا ايتىمەن قۇتتىقتادى.
"وسى قاسيەتتى دە ءدىني مەرەكەگە وراي داڭقتى تاجىكستان حالقىن جانە شەتەلدىك قانداستارىمىزدى شىن جۇرەكتەن قۇتتىقتايمىن. ەلىمىزدەگى ءاربىر وتباسىنا باقىتتى دا باياندى ءومىر، ال سۇيىكتى وتانىمىزعا ماڭگىلىك مىزعىماس بەيبىتشىلىك پەن باياندى تۇراقتىلىق تىلەيمىن", - دەدى.
پرەزيدەنت راحمون ايتپەن قۇتتىقتاپ، ەلدى تاجىك حالقىنا كىر كەلتىرمەۋگە شاقىردى
ء"بىز بالالارىمىزدى داڭقتى بابالارىمىزدىڭ ەسىمى مەن ەستەلىگىنە لايىق بولاتىنداي ەتىپ تاربيەلەۋىمىز كەرەك، مەملەكەت پەن ۇلتتىڭ حالىقارالىق ارەناداعى بەدەلى مەن ءيميدجىن كوتەرىپ، ەشبىر جاعدايدا تاجىك حالقىنىڭ ابىرويىنا نۇقسان كەلتىرمەيتىندەي ەتىپ تاربيەلەۋىمىز كەرەك", - دەدى.
ەسكە سالا كەتەيىك، 22 ناۋرىز كۇنى كەشكە ماسكەۋ تۇبىندەگى Crocus City Hall عيماراتىندا تەراكت بولىپ، 144 ادام قازا تاپقان. ال زارداپ شەككەندەر سانى 551 ادامعا جەتكەن. كۇدىكتى رەتىندە ءتورت تاجىكستان ازاماتى ۇستالعان. ءبىرىنىڭ ايتۋىنشا، وعان ادامداردى اتىپ ولتىرگەنى ءۇشىن 500 مىڭ رۋبل ۋادە ەتىلگەن.
كەيىننەن تۇركيا تاجىكستانمەن ۆيزاسىز رەجيمنىڭ كۇشىن جويدى.
ەمومالي راحمون ناۋرىزدا قوعام وكىلدەرىمەن جانە ءدىن قايراتكەرلەرىمەن كەزدەسۋىندە لاڭكەستەردىڭ مەملەكەت بەدەلىنە كىر كەلتىرىپ جۇرگەنىن ايتقان بولاتىن. ءۇش جىلدا الەمنىڭ 10 ەلىندە تاجىكستاننىڭ 24 ازاماتى لاڭكەستىك ارەكەتتەر جاساعان. ال 10 جىل ىشىندە تاجىك ازاماتتارىنىڭ تاراپىنان ەكسترەميستىك جانە تەرروريستىك سيپاتتاعى 6680 قىلمىس انىقتالىپ، تىركەلگەن.
