Tájikstan prezıdenti Emomalı Rahmon eldi Ramazan aıynyń aıaqtalýymen quttyqtady, dep habarlaıdy "Adyrna" tilshisi.
Prezıdent kúni erteń dúnıe júzi musylmandary qurmet tutatyn Oraza aıtymen quttyqtady.
"Osy qasıetti de dinı merekege oraı dańqty Tájikstan halqyn jáne sheteldik qandastarymyzdy shyn júrekten quttyqtaımyn. Elimizdegi árbir otbasyna baqytty da baıandy ómir, al súıikti Otanymyzǵa máńgilik myzǵymas beıbitshilik pen baıandy turaqtylyq tileımin", - dedi.
Prezıdent Rahmon aıtpen quttyqtap, eldi tájik halqyna kir keltirmeýge shaqyrdy
"Biz balalarymyzdy dańqty babalarymyzdyń esimi men esteligine laıyq bolatyndaı etip tárbıeleýimiz kerek, memleket pen ulttyń halyqaralyq arenadaǵy bedeli men ımıdjin kóterip, eshbir jaǵdaıda tájik halqynyń abyroıyna nuqsan keltirmeıtindeı etip tárbıeleýimiz kerek", - dedi.
Eske sala keteıik, 22 naýryz kúni keshke Máskeý túbindegi Crocus City Hall ǵımaratynda terakt bolyp, 144 adam qaza tapqan. Al zardap shekkender sany 551 adamǵa jetken. Kúdikti retinde tórt Tájikstan azamaty ustalǵan. Biriniń aıtýynsha, oǵan adamdardy atyp óltirgeni úshin 500 myń rýbl ýáde etilgen.
Keıinnen Túrkııa Tájikstanmen vızasyz rejımniń kúshin joıdy.
Emomalı Rahmon naýryzda qoǵam ókilderimen jáne din qaıratkerlerimen kezdesýinde lańkesterdiń memleket bedeline kir keltirip júrgenin aıtqan bolatyn. Úsh jylda álemniń 10 elinde Tájikstannyń 24 azamaty lańkestik áreketter jasaǵan. Al 10 jyl ishinde tájik azamattarynyń tarapynan ekstremıstik jáne terrorıstik sıpattaǵy 6680 qylmys anyqtalyp, tirkelgen.
