تاجىكستاندا بارلىق پەداگوگتار اسكەري قىزمەتتەن بوساتىلدى. بۇعان دەيىن جەڭىلدىك تەك اۋىلدىق جەرلەردە جۇمىس ىستەيتىن مۇعالىمدەرگە عانا قولدانىلىپ كەلگەن دەپ حابارلايدى "ادىرنا".
«ازيا-پليۋس» باسىلىمىنىڭ حابارلاۋىنشا، ءتيىستى تۇزەتۋلەر «اسكەري مىندەت جانە اسكەري قىزمەت تۋرالى» زاڭعا ەنگىزىلدى. قۇجاتتى رەسپۋبليكا پارلامەنتى قابىلداعان. ەندى ونى ءماجليسي ميللي (جوعارعى جينالىستىڭ جوعارعى پالاتاسى) ماقۇلداپ، پرەزيدەنت قول قويعاننان كەيىن زاڭ كۇشىنە ەنەدى.
تاجىكستان ءبىلىم جانە عىلىم ءمينيسترىنىڭ ءبىرىنشى ورىنباسارى حوميد حوشيمزودا بۇل وزگەرىستەردىڭ نەگىزگى ماقساتى مۇعالىم ماماندىعىنىڭ بەدەلىن ارتتىرۋ جانە ءبىلىم بەرۋ سالاسىنداعى كادر تاپشىلىعىن جويۋ ەكەنىن ايتتى.
مينيسترلىكتىڭ دەرەگىنشە، 2025-2026 وقۋ جىلىنىڭ باسىندا ەل مەكتەپتەرىندە 3800-دەن استام مۇعالىم جەتىسپەگەن. بۇل – بيىل پەداگوگيكالىق ماماندىقتار بويىنشا 13 مىڭ تۇلەك وقۋىن اياقتاعانىنا قاراماستان تىركەلگەن كورسەتكىش.
ساراپشىلار تاپشىلىقتىڭ سەبەبىن بىرنەشە فاكتورلارمەن بايلانىستىرادى:
- جاس مامانداردىڭ ۋادە ەتىلگەن جەر تەلىمدەرى مەن الەۋمەتتىك جەڭىلدىكتەردى الماۋى;
- جالاقىنىڭ تومەندىگى;
- اسكەري قىزمەتكە شاقىرۋ كەزىندەگى قىسىم.
ماسەلەنى شەشۋ ماقساتىندا ۇكىمەت «پەداگوگ مارتەبەسى تۋرالى» زاڭ جوباسىن ازىرلەپ، ونى ءماجليسي نامويانداگون (تومەنگى پالاتا) قابىلدادى.
جاڭا زاڭ مۇعالىمدەردىڭ قۇقىقتىق، الەۋمەتتىك جانە قارجىلىق مارتەبەسىن بەكىتىپ، ولاردىڭ كاسىبي بەدەلى مەن ەڭبەگىن قورعاۋعا باعىتتالعان.
قۇجاتقا سايكەس، مۇعالىمدەردى سەنبىلىككە نەمەسە مەكتەپ ىشىندە اقشا جيناۋ سياقتى مىندەتتەرگە تارتۋعا تىيىم سالىنادى.
