بەلگىلى كۇيشى-سازگەر، «اق جاۋىن» مەملەكەتتىك كامەرالىق ۇلت-اسپاپتار وركەسترىنىڭ جەتەكشىسى، قر ەڭبەك سىڭىرگەن ءارتىسى سەكەن تۇرىسبەكوۆتىڭ «كوڭىل تولقىنى» كۇيىن تىڭداماعان جان كەمدە-كەم. كەز كەلگەن ادام شىعارمانىڭ العاشقى اۋەنىن ەستىگەن بويدا تولقىنداي تەربەلىپ، تۇلا بويىنىڭ ەرىكسىز ىرعالىپ كەتەتىنىن سەزبەي دە قالادى.
«كوڭىل تولقىنى» - ناعىز شەدەۆر شىعارما. سەكەن اعانىڭ ايتۋى بويىنشا، بۇل كۇي تاعدىر تالكەگىنە تۇسكەن كەزدە دۇنيەگە كەلگەن. «كوڭىل تولقىنى» 1985-87 جىلدارى تۋعان. سەكەن اعا ەكى جاسار جانار جانە انار اتتى قىزدارىنان تابان استى ايىرىلىپ قالعان. ءبىرىن كولىك قاعىپ كەتسە، ەكىنشىسىنە كوز ءتيىپ قايتىس بولعان. قوس بىردەي بالاسىن جەر استىنا تاپسىرعان سەكەن اعا اۋىر كۇيگە ءتۇسىپ، قاتتى تۇيىقتالىپ كەتكەن. جەر بەتىنە سىيماي، قايعى جامىلعان ساتتە، «كوڭىل تولقىنى» كۇيىن ومىرگە اكەلەدى. كۇي بىردەن كوپشىلىكتىڭ ىستىق ىقىلاسىنا بولەنىپ، كەڭىنەن تارالادى. ءتىپتى، الىس-جاقىن شەتەلدەگى جۇرتشىلىق كۇيدى تىڭداعان بويدا ونىڭ اۆتورىن ىزدەستىرىپ، كۇيدىڭ شىعۋ تاريحىنا بىلگىلەرى كەلەدى. جاپوندىق تىڭدارماندار كۇي اننوتاتسياسىن سۇراعان كەزدە، اۆتور ىشتەگى ورنى تولماس، وكىنىشتى سىرتقا شىعارماس ءۇشىن «بۇل كۇي «نەۆادا-سەمەي» قايعىسىنا ارنالعان ەدى» دەپ قويا بەرگەن.
سەكەن تۇرىسبەكوۆ «كوڭىل تولقىنى» كىتابىندا بىلاي دەپ جازادى: «كۇيدىڭ وزەگىندە اكەنىڭ ورنى تولماس وكىنىشى مەن وكسىگى جاتىر. «كوڭىل تولقىنى» - وزىنە دەيىنگى ۇلى كۇيشى-سازگەرلەردىڭ رۋحاني جالعاسى بولعانىمەن، ىشكى تابيعاتى مۇلدە بولەك، جۇرەك قىلىن دىرىلدەتە شەرتەر كۇشى بار، تىڭداۋشىسىن وي مەن سەزىم تۇڭعيىعىنا تارتاتىن تۋىندى».
دەرەككوز: massaget.kz
"ادىرنا" ۇلتتىق پورتالى
