اتىراۋدا ۇلى جەم وزەنى ارناسىن بۇرۋ ءۇشىن جاساندى بوگەتتەردى جارۋ جۇمىستارى قولعا الىندى، دەپ حابارلايدى "ادىرنا" ءتىلشىسى.
"قازىرگى ۋاقىتتا ۇلى جەم وزەنى ەلدى مەكەنگە قاۋىپ توندىرمەس ءۇشىن، قارعىن سۋدىڭ دەڭگەيىن ءتۇسىرۋ وتە وزەكتى ماسەلە بولىپ وتىر. وسى رەتتە جەمنىڭ بويىندا ورنالاسقان جاساندى بوگەتتەردى جارۋ ارقىلى سۋدىڭ ارناسىن بۇرۋ جۇمىستارى باستالدى", - دەلىنگەن حابارلامادا.
اتىراۋ وبلىسى اكىمىنىڭ ورىنباسارى جۇمىستارعا اەروۆيزۋالدى تەكسەرۋ جۇرگىزىلگەنىن ايتتى.
"جىلىويعا تونگەن قاۋىپتى سەيىلتۋ ماقساتىندا جەم وزەنىنىڭ ساعالارىن اشىپ جاتىرمىز. بۇل ماڭدا كەزىندە كوپتەگەن جەكە شارۋا قوجالىقتار سۋدى جيناپ الۋ ماقساتىندا اعىس كوزىن بىتەپ، جاساندى بوگەتتەر تۇرعىزعان. بۇل قالاعا كەلگەن سۋدىڭ اعىسپەن اعىپ كەتۋىنە ۇلكەن كەدەرگى بولىپ وتىر. سوعان بايلانىستى بىتەلگەن ارنالاردىڭ كوزىن بوگەتتەردى جارۋ ارقىلى اشىپ جاتىرمىز. ونى تروتيلمەن جارىپ، وزەن كەدەرگىسىز اعىپ جاتىر", - دەدى قايرات نۇرتاەۆ.
ەسكە سالا كەتەيىك، وسىعان دەيىن تاسقىن سۋدىڭ قاۋپىنە بايلانىستى جىلىوي اۋدانىندا توتەنشە جاعداي جاريالانعان ەدى.
