Atyraýda Uly Jem ózeni arnasyn burý úshin jasandy bógetterdi jarý jumystary qolǵa alyndy, dep habarlaıdy "Adyrna" tilshisi.
"Qazirgi ýaqytta Uly Jem ózeni eldi mekenge qaýip tóndirmes úshin, qarǵyn sýdyń deńgeıin túsirý óte ózekti másele bolyp otyr. Osy rette Jemniń boıynda ornalasqan jasandy bógetterdi jarý arqyly sýdyń arnasyn burý jumystary bastaldy", - delingen habarlamada.
Atyraý oblysy ákiminiń orynbasary jumystarǵa aerovızýaldy tekserý júrgizilgenin aıtty.
"Jylyoıǵa tóngen qaýipti seıiltý maqsatynda Jem ózeniniń saǵalaryn ashyp jatyrmyz. Bul mańda kezinde kóptegen jeke sharýa qojalyqtar sýdy jınap alý maqsatynda aǵys kózin bitep, jasandy bógetter turǵyzǵan. Bul qalaǵa kelgen sýdyń aǵyspen aǵyp ketýine úlken kedergi bolyp otyr. Soǵan baılanysty bitelgen arnalardyń kózin bógetterdi jarý arqyly ashyp jatyrmyz. Ony trotılmen jaryp, ózen kedergisiz aǵyp jatyr", - dedi Qaırat Nurtaev.
Eske sala keteıik, osyǵan deıin tasqyn sýdyń qaýpine baılanysty Jylyoı aýdanynda tótenshe jaǵdaı jarııalanǵan edi.
