ءىىم اتىراۋدا وتكەن تويدا جۇرگەن باقىتگۇل حامەنوۆا تۇسىرىلگەن ۆيدەوعا قاتىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
قىلمىستىق-اتقارۋ جۇيەسى كوميتەتىنىڭ مالىمەتىنشە، حامەنوۆا شارتتى تۇردە سوتتالعان جانە پروباتسيا قىزمەتىنىڭ باقىلاۋىندا.
«باقىتگۇل حامەنوۆا اتىراۋ قالاسىنىڭ №2 سوتىنىڭ زاڭدى كۇشىنە ەنگەن ۇكىمىمەن جەتى جىلعا باس بوستاندىعىنان ايىرۋ جازاسىنا كەسىلدى. كامەلەتكە تولماعان بالاسىنىڭ بولۋىنا بايلانىستى سوت قر قىلمىستىق كودەكسىنىڭ 74-بابىنىڭ 1-بولىگىنە سايكەس ءۇش جىل مەرزىمگە، بىراق بالاسى 14 جاسقا تولعانعا دەيىن جازانى وتەۋدى كەيىنگە قالدىرۋدى قولداندى»، — دەلىنگەن جاۋاپتى ورگان حابارلاماسىندا.
كوميتەت وكىلدەرى سوتتالعان ازاماتشا كەيىنگە قالدىرۋ كەزەڭىندە زاڭدا بەلگىلەنگەن شەكتەۋلەردى ساقتاۋعا مىندەتتى ەكەنىن اتاپ ءوتتى. اتاپ ايتقاندا، وعان ەلدەن شىعۋعا تىيىم سالىنعان، ول كەمىندە توقسانىنا ءبىر رەت پروباتسيا قىزمەتىندە بەلگىلەنىپ وتىرۋى ءتيىس.
سونداي-اق، حامەنوۆا تۇرعىلىقتى جەرىن وزگەرتكەن جاعدايدا نەمەسە باسقا وڭىرگە شىققاندا پروباتسيا قىزمەتىن حاباردار ەتۋگە، قىزمەتكەردىڭ شاقىرۋى بويىنشا كەلۋگە مىندەتتى. پروباتسيا قىزمەتى مەن اكىمدىك وكىلدەرى ونىڭ بالاسىنىڭ تۇرمىس جاعدايىن تەكسەرىپ وتىرادى.
سونىمەن قاتار كوميتەتتە اتاپ وتكەندەي، سوت شەشىمىمەن مادەني نەمەسە قوعامدىق ءىس-شارالارعا قاتىسۋعا تىيىم سالۋ قاراستىرىلماعان.
ايتا كەتەيىك، 2022 جىلعى 15 قاراشادا اتىراۋ قالالىق سوتى وبلىس اكىمىنىڭ بۇرىنعى ورىنباسارى باقىتگۇل حامەنوۆاعا قاتىستى ۇكىم شىعاردى. ول پارا الۋ بابىمەن كىنالى دەپ تانىلىپ، جەتى جىلعا باس بوستاندىعىنان ايىرىلعان بولاتىن.
