اتىراۋدىڭ جاڭا اكىمى بولىپ مەيىرىم قالاۋي تاعايىندالدى. بۇعان دەيىن ول Nur Otan پارتياسىنىڭ وبلىستىق فيليالى توراعاسىنىڭ ءبىرىنشى ورىنباسارى قىزمەتىن اتقارعان.
قالانىڭ بۇرىنعى اكىمى قايرات ورازباەۆ قاڭتاردا ءوز وتىنىشىمەن قىزمەتىنەن بوساتىلعان ەدى. اتىراۋ وبلىسى اكىمىنىڭ ءباسپاسوز قىزمەتىنىڭ مالىمەتىنشە، قالانىڭ جاڭا باسشىسى بۇل قىزمەتكە پرەزيدەنت اكىمشىلىگى جانە اتىراۋ قالالىق ءماسليحاتىنىڭ كەلىسىمى بويىنشا تاعايىندالدى.
«اتىراۋ وبلىسى اكىمىنىڭ وكىمىمەن اتىراۋ قالاسىنىڭ اكىمى تاعايىندالدى. ول لاۋىزىمعا اتىراۋ وبلىسىنىڭ تۋماسى مەيىرىم قالاۋي تاعايىندالادى»،- دەلىنگەن رەسمي حابارلامادا.
ايماق باسشىسى ماحامبەت دوسمۇحامبەتوۆ مەيىرىم قالاۋيدى اكتيۆكە تانىستىرا وتىرىپ، ونىڭ الدىندا اۋقىمدى مىندەتتەر كۇتىپ تۇرعان تۇرعانىن تىلگە تيەك ەتىپ، جۇمىسىنا ساتتىلىك تىلەدى.
مەيىرىم قالاۋي 1985 جىلى اتىراۋ وبلىسى قىزىلقوعا اۋدانىندا دۇنيەگە كەلگەن. 2006 جىلى «مەملەكەتتىك جانە جەرگىلىكتى باسقارۋ» ماماندىعى بويىنشا ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىن، 2010 جىلى رف پرەزيدەنتى جانىنداعى مەملەكەتتىك قىزمەتتىڭ رەسەي اكادەمياسىن تامامداعان.
ەڭبەك جولىن 2006-2007 جىلدارى «اتىراۋ-اقپارات» كوممۋنالدىق مەملەكەتتىك كاسىپورنىندا باستاعان. 2010-2011 جىلدارى «تۇران» جشس-ءنىڭ ديرەكتورى، "قازاقستان" رترك اتىراۋ وبلىستىق فيليالى ديرەكتورىنىڭ ورىنباسارى - باس رەداكتور بولىپ ەڭبەك ەتكەن.
2011-2012 جىلدارى «اتىراۋ-اقپارات» كمك توراعاسى، 2012-2016 جىلدارى اتىراۋ وبلىستىق جاستار ساياساتى باسقارماسىنىڭ باسشىسى بولىپ قىزمەت اتقاردى. 2016-2019 جىلدارى وبلىس اكىمى اپپارات باسشىسىنىڭ ورىنباسارى، اتىراۋ قالاسى اكىمىنىڭ ورىنباسارى لاۋازىمىندا بولدى.
سونداي-اق، ول "Nur Otan" پارتياسى "Jas Otan" جاستار قاناتىنىڭ اتىراۋ وبلىستىق فيليالىنىڭ اتقارۋشى حاتشىسى قىزمەتىن قوعامدىق نەگىزدە اتقارعان. 2019 جىلدان جاڭا لاۋازىمعا تاعايىندالعانعا دەيىن يندەر اۋدانىنىڭ اكىمى بولىپ جۇمىس ىستەگەن. ودان كەيىن «Nur Otan» پارتياسى اتىراۋ وبلىستىق فيليالى توراعاسىنىڭ ءبىرىنشى ورىنباسارى قىزمەتىن اتقارعان.
"ادىرنا" ۇلتتىق پورتالى
