شىمكەنتتە دارىحاناداعى جارىلىستان كەلگەن شىعىن ەسەپتەلىپ، وقيعا ورنىندا ارنايى كوميسسيا جۇمىس ىستەپ جاتىر. وسىمەن قاتار، قايعىلى وقيعادان بىرنەشە ساعات بۇرىن شىمكەنتتە جارىلىس بولىپ، قايتىس بولعان جاڭا تۋعان نارەستەنىڭ اناسى تاعى ءبىر سابيىنەن ايرىلعانى بەلگىلى بولدى. بۇل تۋرالى «حابار 24» ارناسىنىڭ ەفيرىندە قوعامدىق دەنساۋلىق ساقتاۋ باسقارماسىنىڭ باسشىسى مارات پاشيموۆ ايتتى، دەپ حابارلايدى "ادىرنا" ۇلتتىق پورتالى.
اكىمدىك قازا بولعانداردىڭ وتباسىلارىنا قارجىلاي كومەك كورسەتۋگە ۋادە بەردى. قازىر دارىگەرلەر تاعى سەگىز قۇرباننىڭ ءومىرى ءۇشىن كۇرەستى جالعاستىرۋدا. ولاردىڭ اراسىندا پەريناتالدى ورتالىق قىزمەتكەرلەرى: مەدبيكەلەر، مەدبيكە جانە پەرزەنتحاناعا ينتەرنەت ورناتۋعا كەلگەن ەر ادام بار.
«جەرلەۋگە، ەسكە الۋعا كەتەتىن بارلىق شىعىندى اكىمدىك ءوز موينىنا الدى. سودان كەيىن اقشالاي وتەماقى. مەملەكەتتىك قۇرىلىمداردا جۇمىس ىستەيتىندەردىڭ بارلىعى ساقتاندىرىلعان. حالىق بارلىق تولەمدەردى تولىق الادى»، - دەدى مارات پاشيموۆ.
سونداي-اق، جارىلىس سالدارىنان جاقىن جەردەگى كوپقاباتتى ءۇي مەن بىرنەشە كولىكتىڭ زاقىمدانعانى بەلگىلى بولدى. ازىرگە جارىلىس سەبەبىن انىقتاۋعا ءبىر اي قاجەت بولۋى مۇمكىن. بۇل تۋرالى توتەنشە جاعدايلار دەپارتامەنتىنەن حابارلادى. وقيعا ورنىندا ماماندار جۇمىستى جالعاستىرۋدا. ءبىر كۇن بۇرىن ولار جارىلىس بولعان عيماراتتا ءدارى-دارمەك جاسالىپ جاتقانىن حابارلادى. ول جەكە كومپانياعا تيەسىلى. بولمەدە 2 توننا سۋتەگى توتىعى بولعان.
«كومەك تولىق كولەمدە كورسەتىلدى. ەكەۋىنىڭ جاعدايى اۋىر، بىراق تۇراقتى. قالعان التى ناۋقاس ورتاشا اۋىرلىقتا. بارلىق قاجەتتى دياگنوستيكالىق جانە ەمدىك شارالار جۇرگىزىلۋدە. رەسپۋبليكالىق ەمحانالارمەن بىرنەشە رەت تەلەكونسۋلتاتسيالار جۇرگىزىلدى» دەپ ءتۇسىندىردى قر دەنساۋلىق ساقتاۋ مينيسترلىگى انا مەن بالا دەنساۋلىعىن قورعاۋ دەپارتامەنتىنىڭ ديرەكتورى ماعريپا ەمبەرگەنوۆا.
قازىر ءىستى تەرگەپ جاتقان پوليتسيا دەپارتامەنتى بولجام بويىنشا عيماراتتا گاز جينالعانىن ايتتى.
ەسكە سالساق، قايعىلى وقيعا سەنبى كۇنى ءتۇس كەزىندە ورىن العان. الدىن الا بولجام بويىنشا، پەرزەنتحانا ماڭىنداعى ءدارىحانادا وتتەگى بالونى جارىلعان. قازا تاپقاندار اراسىندا پەرزەنتحانا كۇزەتشىسى مەن بريگادا قۇرامىندا كۇردەلى جوندەۋ جۇمىستارىن جۇرگىزىپ جاتقان قۇرىلىس كومپانياسىنىڭ قىزمەتكەرى دە بار.
"ادىرنا" ۇلتتىق پورتالى
