تۇركىستان قالاسىنىڭ اكىمدىگىنىڭ اپپارات قىزمەتكەرلەرى وتىرعان عيماراتتى قالا باسشىلىعى نارىقتاعى قۇنىنان الدەقايدا ارزان باعاعا ساتىپ جىبەرگەن، دەپ حابارلايدى "ادىرنا" ۇلتتىق پورتالى جەرگىلىكتى پروكۋراتۋراعا سىلتەمە جاساپ.
4 قاباتتى ەڭسەلى عيمارات ەسىم حان الاڭىندا ورنالاسقان. ال ول جەر تۇركى الەمىنىڭ رۋحاني قازىناسىنا اينالعان قوجا احمەت ياساۋي كەسەنەسىنەن نەبارى 300 مەتر قاشىقتىقتا تۇر. قالالىق اكىمدىكتىڭ جۇزدەگەن قىزمەتكەرى وسىلايشا ەكى جىلدان بەرى جالعا الىنعان وزگە عيماراتتاردى جاعالاپ جۇرۋگە ءماجبۇر. ال، قالانىڭ قاق ورتاسىنداعى عيماراتتىڭ مەملەكەت مەنشىگىنەن شىعىپ كەتكەنىن قالالىق پروكۋراتۋرانىڭ وكىلدەرى ءبىلىپ قويىپ، اكىمدىكتىڭ بۇل ارەكەتىنە ارالاستى.
تۇركىستان قالاسىنىڭ پروكۋرورى جاننۇر احمەتبەكتىڭ مالىمەتىنشە، اكىمدىك ەلەكتروندى اۋكتسيون وتكىزگەندە وعان ءبىر عانا ادام قاتىسىپ، جەڭىمپاز بولىپ شىققان. تالاپ بويىنشا اۋكتسيونعا قاتىسۋشى ۇيىمنىڭ سانى ەكىدەن كەم بولعان جاعدايدا كونكۋرس وتكىزىلمەۋى ءتيىس. قىزىعى، بۇل قاعيدا قاپەردەن قالىس قالىپ، جەڭىمپاز بولعان ايەل الگى عيماراتتى قوناق ۇيگە اينالدىرماقشى بولادى. الايدا، شەنەۋنىكتەردىڭ ارەكەتىن پروكۋراتۋرا ءبىلىپ قويىپ، اكىمدىكتى سوتقا بەرگەن ەدى.
«جەكەشەلەندىرۋ وبەكتىسىنىڭ نارىقتىق قۇنىن باعالاۋ تۋرالى 2020 جىلعى 18 تامىزداعى № 99 ساندى كەلىسىم-شارتتىن جارامسىز دەپ تانىپ، كۇشىن جويۋ. «باعالاۋ جانە ساراپتاما» جشس 2020 جىلعى 18 تامىزداعى № H10-08 جىلجىمايتىن مۇلىكتى باعالاۋ تۋرالى ەسەبىن جارامسىز دەپ تانىپ، كۇشىن جويۋ. 2020 جىلعى 7 قازانداعى ەلەكتروندىق اۋكتسيوننىڭ قورىتىندىسىنىڭ № 163366 ساندى حاتتاماسىن جارامسىز دەپ تانىپ، كۇشىن جويۋ. 2020 جىلعى 8 قازانداعى «تۇركىستان قالاسى اكىمدىگىنىڭ ەكونوميكا جانە قارجى ءبولىمى» مم مەن جەكە كاسىپكەر قۇلبيبى بەكتاسوۆا اراسىنداعى عيماراتتى ساتىپ الۋ-ساتۋ تۋرالى № 21408-ەتپ ساندى كەلىسىم-شارتىن جارامسىز دەپ تانىپ، كۇشىن جويۋ. 2020 جىلعى 19 قازانداعى «تۇركىستان قالاسى اكىمىنىڭ اپپاراتى» مم مەن جەكە كاسىپكەر قۇلبيبى بەكتاسوۆا اراسىنداعى № 1 ساندى مەملەكەتتىك مۇلىكتى ساتىپ الۋ-ساتۋ بويىنشا قابىلداۋ-وتكىزۋ اكتىسىن جارامسىز دەپ تانىپ، كۇشىن جويۋ»، - دەپ كورسەتتى تۇركىستان قالاسىنىڭ پروكۋرورى جاننۇر احمەتبەك.
4 قاباتتى عيماراتتىڭ جالپى كولەمى 2554,7 شارشى مەتردەن اسادى. وعان اكىمدىك 2018 جىلى 257,1 ميلليون تەڭگەگە كۇردەلى جوندەۋ جۇمىستارىن جۇرگىزەدى. الايدا، ارادا كوپ ۋاقىت وتپەستەن ءساندى ساياباقتىڭ جانىنداعى مەملەكەتتىڭ مۇلكىن جەكەشەلەندىرۋ جونىندە تۇركىستان قالاسىنىڭ اكىمى ارنايى قاۋلى شىعارادى. قالالىق ەكونوميكا جانە قارجى ءبولىمى عيماراتتىڭ قۇنىن باعالاتۋ ءۇشىن نۇرگۇل بيمۋرزاەۆا ەسىمدى ازاماتشا باسقاراتىن الماتىداعى «باعالاۋ جانە ساراپتاما» جشس قىزمەتىنە جۇگىنگەن. 2020 جىلدىڭ 18 تامىزىندا شىققان اكىمنىڭ قاۋلىسى نەگىزىندە عيمارات ەلەكتروندىق ساۋدا-ساتتىققا قويىلىپ، كوكشەتاۋلىق 74 جاستاعى زەينەتكەر ايەلگە 313 ميلليون 736 مىڭ تەڭگەگە ساتىلادى. ىرگەتاسى 1972 جىلى قالانعان نىساندى وسىلايشا شاعىن بيزنەسى بار كۇلبيبى بەكتاسوۆا ۇتادى.
«بىزگە زاڭدى تۇردە ەلەكتروندى اۋكتسيون ارقىلى ساتىلدى. عيماراتتى ساتىپ العان كەزدە مەنىڭ بالام بىردەن كوكشەتاۋدان تۇركىستانعا ۇشىپ كەتتى. قوناق ءۇي اشقىمىز كەلگەن. وتباسىلىق بيزنەسپەن اينالىسامىز. عيمارات سىرتىنان ادەمى كورىنگەنمەن، ىشىندە ەشتەڭە جوق. ونى كەيىن بىلدىك. ءبىز جەڭىمپاز بولعان سوڭ 313 ميلليون تەڭگەنى بىردەن تولەپ تاستادىق. ءبىر اپتا وتپەي جاتىپ قۇزىرلى ورگاندار، الدىمەن قر ۇقك ارالاستى. تۇسىنىكسىز جاعدايلار كوپ. كوكشەتاۋ قالاسىندا تۇرامىز، ەكى ورتاعا شاپقىلاۋمەن شارشادىق»، - دەدى جەكە كاسىپكەر قۇلبيبى قامباربەكقىزى.
كۇردەلى جوندەۋ جۇمىستارى جۇرگىزىلگەن عيماراتتىڭ ءىشى ءبىر جىلعا جەتپەي قيراپ قالعان. قولدان قيراتىلعان. ال ونى كىمنىڭ قانداي ماقساتتا ىستەگەنى «بەلگىسىز». پروكۋراتۋرانىڭ انىقتاۋىنشا، جەكەشەلەندىرۋ وبەكتىسىنىڭ نارىقتىق قۇنى 29,17% دەيىن تومەندەتىلگەن. تۇركىستان وبلىسى بويىنشا سوت ساراپتامالارى ينستيتۋتىنىڭ قورىتىندىسىنا سايكەس، جەكەشەلەندىرۋ وبەكتىسىنىڭ نارىقتاعى قۇنى 438 ميلليون 604 مىڭ تەڭگەدەن اسادى. ىشىندەگى بۇلىنگەن دۇنيەلەردى قالپىنا كەلتىرۋگە تاعى 146 ميلليون 941 مىڭ تەڭگە قاجەت. «مەملەكەتتىك مۇلىك تۋرالى» قر زاڭىنىڭ 18-بابى 10-تارماعىنا سايكەس اۋدانداردىڭ، وبلىستىق ماڭىزى بار قالالاردىڭ جەرگىلىكتى اتقارۋشى ورگاندارى اۋداندىق كوممۋنالدىق مۇلىكتىڭ پايدالانىلۋىن جانە ساقتالۋىن باقىلاۋدى قامتاماسىز ەتەدى. الايدا، تۇركىستان قالاسىنىڭ اكىمدىگى باسقا عيماراتقا كوشكەنىنە كوپ ۋاقىت وتپەسە دە (07.12.2019ج.), اپپارات تەڭگەرىمىندەگى جىلجىمايتىن مۇلىكتىڭ بۇلىنۋدەن قورعالۋىن قامتاماسىز ەتپەگەن. ياعني، باعالاۋ جۇمىستارى باستالعانعا دەيىن عيماراتتى زاڭسىز بۇزۋ (كابينەتتەردىڭ توبەلەرى، ەسىك پەن تەرەزەلەرى، قابىرعالارى بۇزىلعان) جۇمىستارى باستالىپ كەتكەن.
«08.10.2020ج. تۇركىستان قالاسى اكىمدىگىنىڭ ەكونوميكا جانە قارجى ءبولىمى مەن كۇلبيبى بەكتاسوۆا اراسىندا عيماراتتى ساتىپ الۋ-ساتۋ تۋرالى № 21408-ەتپ كەلىسىمشارتى تۇزىلگەن. اتالعان عيماراتقا قاتىستى ءىس-ارەكەتتەر زاڭسىز بولىپ تابىلادى جانە كەلەسى ءمان-جايلار بويىنشا بۇزىلۋعا جاتادى. باعالاۋ تالاپتارىن بۇزا وتىرىپ، جشس فيزيكالىق سيپاتتامالارى تۋرا كەلمەيتىن، باسەكەلەس بولا المايتىن جىلجىمايتىن مۇلىكتىڭ شارشى مەترىن ءۇش ەسە تومەن وبەكتىلەرمەن سالىستىرعان. ياعني، عيماراتتىڭ قۇنى نارىقتا ماعىنالاس نىسانداردىڭ جوقتىعىنا قاراماستان بالامالى ءادىستى زاڭسىز قولدانۋ ارقىلى شىعارىلعان. 2018جىلى جۇرگىزىلگەن جوندەۋ جۇمىستارى (257,1 ملن. تەڭگە) باعالاۋ قۇنىنا كىرگەندە، عيماراتتىڭ نارىقتىق قۇنىن ەداۋىر جوعارى باعالاۋعا مۇمكىندىك بەرەتىن ەدى»، - دەدى تۇركىستان قالالىق پروكۋراتۋراسىنىڭ قىزمەتكەرى ناربەك مىقتىباەۆ.
تۇركىستانعا جەكە ستاتۋس بەرىلگەن سوڭ عيماراتقا كۇردەلى جوندەۋ جۇمىستارى ءۇشىن 257,1 ملن تەڭگەنىڭ قارجىسى بولىنەدى. اپپارات پەن «شاڭىراق» وندىرىستىك كووپەراتيۆى اراسىندا كەلىسىمشارت جاسالادى. 181 ملن.تەڭگە عيماراتتىڭ قاسبەتى قاپتالىپ، 76,1 ملن.تەڭگەگە اعىمداعى جوندەۋ جۇمىستارى جاسالادى. 4 380 شارشى مەتر ىشكى قابىرعالار ەمۋلسيالىق كومپوزيتسيالارمەن بويالسا، 3269 شارشى مەتر توبە جاڭارتىلىپ، 3800 شارشى مەترلىك ەدەنگە پاركەت توسەلەدى. 68 دانا ەسىك پەن 426 ليۋسترا، دارەتحانالاردا تۇگەل جاڭارتىلادى. الايدا، وسىنشاما جۇمىستاردان كەيىن عيماراتتى ساتۋعا شىعارعان اكىمدىك نىساندى باعالاۋشىلاردىڭ ارەكەتىنە كوز جۇما قاراعان.
«باعالاۋ ادiستەرiن تاڭداۋ جانە قولدانۋ كەزiندە باعالاۋشى قۇقىقتىق تالداۋ جۇرگiزۋ، مۇلiكتiك قۇقىقتار مەن اۋىرتپالىقتاردى سايكەستەندىرۋ، باعالاۋ تۋرالى ەسەپتە شىنايى دەرەكتەردi, ەسەپتiك كورسەتكiشتەردi جانە جۇرگىزىلگەن باعالاۋدى ايقىن ءتۇسىندىرۋ ءۇشىن ناتيجەلەردi تولىققاندى جانە تۇسiنiكتi جازۋدى قامتاماسىز ەتۋى قاجەت. الايدا، جشس عيماراتتىڭ نارىقتىق قۇنىن باعالاۋ كەزىندە قۇقىقتىق تالداۋ جۇرگىزبەگەن، باعالاۋ تۋرالى ەسەپكە شىنايى دەرەكتەردى ەنگىزبەگەن. اتاپ ايتقاندا، جشس جەر تەلىمىنە تۇراقتى پايدالانۋ قۇقىعىن بەرەتىن اكت پەن عيماراتتىڭ تەحنيكالىق پاسپورتىن زەرتتەۋمەن شەكتەلگەن، جىلجىمايتىن مۇلىك يەسىنىڭ قۇقىعىن راستايتىن قۇجاتتاردى سۇراتپاعان. قۇقىقتىق تالداۋ جۇرگىزبەگەن»، - دەدى پروكۋراتۋرانىڭ وكىلى.
جەر ۋچاسكەسiن تيiستi يەلiكتەن شىعارماي، جىلجىمايتىن مۇلiكتi باسقانىڭ مەنشىگىنە بەرۋگە جول بەرiلمەيدi. زاڭنامالىق تالاپتاردى بۇزا وتىرىپ ساراپتاما جۇرگىزگەن باعالاۋ كومپانياسى جىلجىمايتىن مۇلiك ورنالاسقان جەردىڭ قۇنىن دا ەسەپكە الماعان. بۇل ارەكەت تە شىنايى باعانى ارزان ەتىپ كورسەتۋگە اسەر ەتكەن. اپپاراتتاعىلار عيمارات ورنالاسقان جەر تەلىمدەرىن دەربەس جەر ۋچاسكە رەتىندە بولمەگەن. بۇنداي جاعدايدا اپپاراتتىڭ كوممۋنالدىق باسقارۋىنداعى جەر ۋچاسكەسىنە مەنشiك قۇقىعى جۇرگىزىلمەي-اق، نىساندى ساتىپ الۋشىعا جەر تەگىن ءوتىپ كەتەدى. پروكۋراتۋرا «تۇركىستان قالاسى اكىمىنىڭ اپپاراتى» مم، «تۇركىستان قالاسى اكىمدىگىنىڭ ەكونوميكا جانە قارجى ءبولىمى» مم، جەكە كاسىپكەر كۇلبيبى بەكتاسوۆا مەن «باعالاۋ جانە ساراپتاما» جشس سوتقا بەرگەن. جاۋاپكەر تاراپتاردىڭ ءبارى سوتتا ءوز ارەكەتىنىڭ زاڭدى ەكەنىن دالەلدەۋگە تىرىسىپ، قاتەلىكتەرىن مويىنداماعان. سوتتان پروكۋراتۋرانىڭ تالابىن تولىق قاناعاتتاندىرۋسىز قالدىرۋدى سۇراعان. الايدا، ازاماتتىق پروتسەستىك كودەكستىڭ 117, 223, 226-باپتارىن باسشىلىققا العان سۋديا ولاردىڭ تالابىن قاناعاتتاندىرعان جوق.
«تۇركىستان قالاسى اكىمدىگىنىڭ ەكونوميكا جانە قارجى ءبولىمى» مم مەن جەكە كاسىپكەر بەكتاسوۆا قۇلبيبى قامباربەكقىزىنىڭ اراسىنداعى عيماراتتى ساتىپ الۋ-ساتۋ تۋرالى 2020 جىلدىڭ 8 قازانىنداعى № 21408-ەتپ ساندى كەلىسىم-شارتتى جارامسىز دەپ تانىپ، كۇشىن جويىلسىن. 19 قازانداعى «تۇركىستان قالاسى اكىمىنىڭ اپپاراتى» مم مەن جەكە كاسىپكەر ق.ق. بەكتاسوۆا اراسىنداعى № 1 ساندى مەملەكەتتىك مۇلىكتى ساتىپ الۋ-ساتۋ بويىنشا قابىلداۋ-وتكىزۋ اكتىسى جارامسىز دەپ تانىلىپ، كۇشىن جويىلسىن. جاۋاپكەر جەكە كاسىپكەر ق.بەكتاسوۆادان مەملەكەتتىڭ پايداسىنا مەملەكەتتىك باج سالىعى 2 917 تەڭگە ءوندىرىلسىن»، - دەلىنگەن سۋديا قۋاندىق مىرزاحمەتوۆ شىعارعان سوت شەشىمىندە.
شەشىم ءالى زاڭدى كۇشىنە ەنگەن جوق. شەشىممەن كەلىسپەگەن تاراپتار ءبىر ايدىڭ ىشىندە تۇركىستان وبلىستىق سوتىنىڭ ازاماتتىق ىستەر جونىندەگى سوت القاسىنا تۇركىستان وبلىسىنىڭ مامانداندىرىلعان اۋدانارالىق ەكونوميكالىق سوتى ارقىلى شاعىم تۇسىرە الادى. مەملەكەتتىڭ قۇندى مۇلىگىن جەكەگە وتكىزۋدىڭ جولىن تاپقان اكىمدىكتىڭ قىزمەتكەرلەرىنە قاتىستى ەكونوميكالىق تەرگەۋ دەپارتامەنتى قىلمىستىق ءىس اشقان.
«بۇل عيماراتتىڭ شىنايى باعاسى 57 ميلليون تەڭگە. ءبىز ونى 313 ميلليون تەڭگەگە قىمباتقا ساتىپ الدىق. سوت ءىسىن جالعاستىرا بەرەمىز، اپەللياتسيالىق شاعىم تۇسىرەمىز، ويتكەنى ءبىز وعان كوپ اقشا سالدىق، اقشانى قارىزعا الدىق. ءبىزدىڭ ماقساتىمىز اقشانى قايتارۋ ەمەس، عيماراتتى وزىمىزدە قالدىرۋ. ويتكەنى، عيمارات ىشىندە ەشتەڭە بولعان جوق. كابينەتتەردىڭ ءىشى بۇلىنگەن، شاشىلىپ جاتىر. بولمەلەردىڭ اراسىنداعى قابىرعالار دا اشىق. كوپ دۇنيە بۇلىنگەن. تۇركىستانعا ستاتۋس بەرىلگەن كەزدە «BI Group» ءبىر نارسە جاساعىسى كەلگەن، سوندىقتان ونىڭ ءىشى بۇزىلعان دەيدى. عيماراتتىڭ ءىشى تسەمەنت پەن سىنعان، شاشىلىپ جاتقان قۇرىلىس زاتتارىنا تولى»، - دەدى سوتتىڭ شەشىمىنە نارازىلىعىن بىلدىرگەن قۇلبيبى بەكتاسوۆا.
كاسىپكەردىڭ سوزىنشە، نىسان جوندەۋ جۇمىستارى جۇرگىزىلگەن عيماراتقا ۇقسامايدى. ال وزدەرىنە ءالى تولىققاندى تۇراق تاپپاعان قالالىق اكىمدىكتىڭ ءباسپاسوز قىزمەتى جاڭارعان عيماراتتى ساتۋعا نە تۇرتكى بولعانىن ايتۋعا رەسمي ساۋالحات سۇراتتى. 8 ايعا سوزىلعان داۋلى ءىستىڭ تاعى قانشا ۋاقىتقا جالعاساتىنى بەلگىسىز.
