ەلوردادا 15 قىركۇيەكتەن باستاپ بىرقاتار مەملەكەتتىك مەكەمەلەر مەن كۆازيمەملەكەتتىك كومپانيالار ءۇشىن جۇمىس كۇنىنىڭ باستالۋ ۋاقىتى وزگەرەدى، دەپ حابارلايدى "ادىرنا" ۇلتتىق پورتالى.
بۇل تۋرالى قالا اكىمدىگىنىڭ ءباسپاسوز قىزمەتى مالىمدەدى.
شارانىڭ باستى ماقساتى – تاڭەرتەڭگى جانە كەشكى قاربالاس ۋاقىتتا جولداعى جۇكتەمەنى ازايتىپ، قالادا قوزعالىستى جەڭىلدەتۋ. وزگەرىستەر نەگىزىنەن ورتالىقتا ورنالاسقان مەملەكەتتىك قۇرىلىمدار مەن ۇلتتىق كومپانيالارعا قاتىستى. ال مەكتەپتەر، اۋرۋحانالار مەن حقكو بۇرىنعى رەجيمدە جۇمىسىن جالعاستىرادى.
الدىن الا ەسەپ بويىنشا، بۇل شارالار جولداعى جۇكتەمەنى 15–20%-عا دەيىن ازايتۋى مۇمكىن. ساراپشىلار مۇنداي قادام تەك جول قوزعالىسىنا ەمەس، سونىمەن قاتار ەكولوگياعا دا وڭ اسەر ەتەتىنىن ايتادى.
ماۋسىم ايىندا قالا اكىمى جەڭىس قاسىمبەك مەملەكەتتىك ورگاندار مەن كوممۋنالدىق قىزمەتتەردىڭ جۇمىسىن ەرتەرەك باستاۋ مۇمكىندىگىن قاراستىرىپ جاتقانىن مالىمدەگەن ەدى. كەيىن بۇل باستامانى ءماجىلىس دەپۋتاتتارى دا قولدادى.
ەڭبەك مينيسترلىگى جاڭا رەجيمدى سىناقتان وتكىزىپ، قىزمەتكەرلەردىڭ 08:00–17:30 ارالىعىنداعى جۇمىس كەستەسى ءتيىمدى بولعانىن حابارلادى. قىزمەتكەرلەر كەڭسەگە ەركىن جەتىپ، كەشكى ۋاقىتتا وتباسىنا كوبىرەك ۋاقىت بولە باستاعان.
وسىعان ۇقساس شارالار الماتىدا دا قاراستىرىلىپ جاتىر. وندا ستۋدەنتتەردىڭ ساباق كەستەسىن وزگەرتۋ جانە كەيبىر قىزمەتكەرلەردى قاشىقتان جۇمىسقا كوشىرۋ ۇسىنىلعان.
