استانادا تۇنگى كلۋب كۇزەتشىلەرىنىڭ قولىنان قازا تاپقان 32 جاستاعى ازات قابيكەنوۆتىڭ اناسى ءادىل ۇكىم شىعۋىن تالاپ ەتەدى، دەپ حابارلايدى "ادىرنا" ۇلتتىق پورتالى "ينفورمبيۋروعا" سىلتەپ.
قايعىلى وقيعا "الانيا" تۇنگى كلۋبىندا بولعان. تەرگەۋ ماتەريالدارىنا سايكەس، مەكەمە كۇزەتشىلەرى كەلۋشى ازاتتى جابىلىپ سوققىعا جىققان. اۋىر جاراقات العان ازامات ءۇش اي بويى ەس-ءتۇسسىز حالدە اۋرۋحانادا جاتىپ، اقىرى كوز جۇمعان. مارقۇمنىڭ ارتىندا اناسى مەن باۋىرلارى قالدى.
“ۇلىمنىڭ ولىمىنە قاتىستى ادامداردىڭ بارلىعى ءتيىستى جازاسىن السىن دەپ تىلەيمىن. قازىرگى سوت بارىسى كوڭىلىمىزدەن شىقپاي وتىر. ءىس بۇرمالانىپ جاتقان سياقتى،” – دەدى مارقۇمنىڭ اناسى ايسۇلۋ نيەتباەۆا.
قازىرگى تاڭدا سوت پروتسەسى جالعاسۋدا. قاماۋعا الىنعان ءتورت كۇزەتشىدەن جاۋاپ الىنعان، ال تاعى ەكى كۇدىكتى ۇيقاماقتا وتىر. ءبىر ادام ىزدەستىرىلىپ جاتىر.
جابىرلەنۋشى تاراپتىڭ ادۆوكاتى ءلاززات تەمىرجانوۆانىڭ ايتۋىنشا، سوت بارىسىندا مەملەكەتتىك ايىپتاۋشىلار بىرنەشە رەت اۋىسقان.
“بىرقاتار پروكۋرورلار سوتقا دايىندىقسىز كەلدى. بۇل – ءىس بويىنشا ءۇشىنشى مەملەكەتتىك ايىپتاۋشى. ءبىز پروكۋراتۋراعا رەسمي شاعىم تۇسىردىك. ءادىل ۇكىم شىعارىنا سەنەمىز،” – دەدى ادۆوكات.
