بىلعى كوكتەمدەگى تابيعاتتىڭ توسىننان مىنەزى ءبارىمىزدى ابىگەرگە سالعانى بەلگىلى. تابيعي اپاتتىڭ الدىن الۋعا قاۋقارىمىز جەتپەسەدە، وڭىرىمىزدە ورىن العان سۋ تاسقىنىنان قيىن جاعدايعا تاپ بولعان جەرلەستەرىمىزدى بارىمىزشا قولداۋعا تىرىسۋدامىز. ورال قالاسىنداعى بقو اكىمدىگى قوعامدىق دامۋ باسقارماسىنىڭ «قوعامدىق كەلىسىم» كمم العاشقىلاردىڭ ءبىرى بولىپ گۋمانيتارلىق كومەك كورسەتۋ شتابىن قۇرىپ، ارنايى قابىلداۋ پۋنكتىن اشتى.
كۇنى كەشە وڭىردەگى كۇردەلى جاعدايعا بايلانىستى وبلىسىمىزدىڭ ءبورلى، تەرەكتى، سىرىم جانە قاراتوبە اۋداندارىندا جانە ورال قالاسىندا توتەنشە جاعداي جاريالاندى.
گيدرومەتەورولوگيالىق جاعدايلار سۋ دەڭگەيىنىڭ كوتەرىلۋىنە الىپ كەلىپ، ەلدى مەكەنىمىزگە قاۋىپ ءتوندىرىپ، جالپى سانى 5000-عا جۋىق ادام قاۋىپسىز ورىندارعا كوشىرىلدى. وسى تۇستا بقو قازاقستان حالقى اسسامبلەياسىنىڭ باستاۋىمەن قحا قۇرىلىمدىق بولىمشەلەرى وكىلدەرى، «اسسامبلەيا جاستارى»، بىرقاتار ۇكىمەتتىك ەمەس ۇيىمدار مەن وڭىرىمىزدەگى كاسىپكەرلەر، وبلىس تۇرعىندارى قولداۋ كورسەتىپ، ءبىرى اقشالاي قاراجات اۋدارسا، ەندى ءبىرى ازىق-تۇلىك، كيىم-كەشەكپەن قامتاماسىز ەتۋگە ات سالىستى.
- ءبىز، بقو حالقى اسسامبلەياسى ۇجىمى قولداۋ كورسەتكەن بارشا جانمەن بىرلەسىپ، وبلىسىمىزدا ورىن العان جاعدايعا بايلانىستى كۇش بىرىكتىرىپ، اسار جاريالادىق. بۇل رەتتە قالا تۇرعىندارى ايانىپ قالمادى. قابىلداۋ پۋنكتىمەن تىكەلەي بايلانىستا بولىپ، قاجەتتى زاتتاردى جيناۋدا ءبىر كىسىدەي اتسالىستى. گۋمانيتارلىق كومەك جيناۋعا قاتىسقان بارشا ازاماتقا العىسىم شەكسىز. بىرىگىپ ارەكەت ەتسەك، ءبىز جەڭە المايتىن قيىندىق جوق،- دەيدى يگى ءىستىڭ باستاماشىلارىنىڭ ءبىرى، بقو قحا ەرىكتىلەر قوزعالىسى ورتالىعىنىڭ جەتەكشىسى، «بيرليك» ءازىربايجان ەتنومادەني بىرلەستىگى توراعاسىنىڭ ورىنباسارى ەلگۋن دجاناليەۆ.
بۇگىنگە دەيىن قابىلداۋ پۋنكتىندە جينالعان قاراجاتتىڭ جالپى سوماسى 25 ملن تەڭگەنى قۇرايدى. العاشقى كۇندەردىڭ وزىندە-اق 2 ملن تگ-گە جۋىق جينالعان قاراجاتتىڭ ءبىر بولىگى اقشالاي اۋدارىلسا، كەلەسى جارتىسى گۋمانيتارلىق كومەك ەسەبىندە ازىق-تۇلىكپەن، تۇرمىستىق قاجەتتىلىك زاتتارى جانە كيىم-كەشەكپەن تولىقتى. قارجىلاي كومەك كورسەتكەندەردىڭ قاراجاتىنا «اسسامبلەيا جاستارى» جانە قحا قۇرىلىمدارى مەن «Respublica» پارتياسى وكىلدەرى اۋىل تۇرعىندارىنا قوسىمشا ازىق-تۇلىك پەن سانيتارلىق-گيگيەنالىق تاۋارلار ساتىپ الدى.
30 ناۋرىز كۇنى وڭىرىمىزدەگى سۋ تاسقىنىنان زارداپ شەككەن جەرلەستەرىمىزگە ارنالعان گۋمانيتارلىق كومەك ەكى «گازەل» جانە ءۇش جۇك اۆتوكولىگىنە تيەلىپ، وبلىسىمىزدىڭ سىرىم، قاراتوبە اۋداندارىنداعى قابىلداۋ پۋنكتىنە جەتكىزىلىپ، حالىققا تاراتىلدى.
وبلىسىمىزدا سۋ تاسقىنىمەن كۇرەس جانە اپاتتان قۇتقارۋ، سونداي-اق قالپىنا كەلتىرۋ جۇمىستارى ءالى دە جالعاسۋدا.
