اتىراۋدا مامانداندىرىلعان اۋدانارالىق ەكونوميكالىق سوتى اسكەري قيمىلداردان زارداپ شەككەندەرگە گۋمانيتارلىق كومەك كورسەتۋ ماقساتىندا قۇرىلعان «سلاۆا ۋكراينى» قايىرىمدىلىق قورىنىڭ تىركەۋىن جويۋ تۋرالى شەشىم شىعاردى، دەپ حابارلايدى «ادىرنا» ۇلتتىق پورتالى ادام قۇقىقتارى مەن زاڭدىلىقتى ساقتاۋ جونىندەگى قازاقستان حالىقارالىق بيۋروسىنا سىلتەمە جاساي وتىرىپ.
جەكە قور اتىراۋ وبلىسىنىڭ ادىلەت دەپارتامەنتىندە 10 تامىزدا تىركەلسە، 25 تامىزدا سول باسقارما مەملەكەتتىك تىركەۋدى جارامسىز دەپ تانۋ جانە ۇيىمدى ماجبۇرلەپ تاراتۋ تۋرالى تالاپ ارىزبەن سوتقا جۇگىنگەن.
تاراتۋ تۋرالى شەشىمنىڭ ءوزى 2023 جىلدىڭ 3 قاراشاسىنان باستالعان.
تالاپ قويۋشى تالاپ ارىزىندا ۇيىم جارعىسىنىڭ زاڭ نورمالارىنا سايكەس كەلمەيتىندىگىنە دالەلدەر كەلتىرگەن.
بۇل قوردىڭ باسشىسى تۇراربەك قۇسايىنوۆ دەمەۋشىلەردىڭ قولداۋىمەن ۋكراينادا زارداپ شەككەندەرگە بەس ميلليون تەڭگە كولەمىندە گۋمانيتارلىق كومەك جىبەرىپ ۇلگەرگەن. بۇل ارەكەت سولتۇستىك كورشىلەرىمىزگە ونشا ۇناماعان شىعار، سوندىقتان ءبىزدىڭ مەملەكەت بۇل جوبادان قۇتىلۋ تۋرالى بۇيرىق العان، دەپ ەسەپتەيدى قۇسايىنوۆ.
رەسەيدىڭ ۋكرايناعا جاساعان شابۋىلىنان كەيىن الماتىدا ۋكراين حالقىن قولداۋعا ارنالعان كەلىسىلگەن شەرۋ، سونداي-اق ەلدە ونداعان شاعىن اكتسيالار ءوتتى. الايدا سوڭعى ءبىر جىلدا ۋكراينا حالقىمەن ىنتىماقتاسۋ اكتسيالارىن وتكىزۋگە قاتىستى بارلىق حابارلامالار قازاقستاندىق شەنەۋنىكتەردىڭ قارسىلىعىنا تاپ بولعان.
«ادىرنا» ۇلتتىق پورتالى
