Bügın Ükımet otyrysynan keiın su tasqynyna bailanysty baspasöz mäslihaty öttı, dep habarlaidy "Adyrna" portaly.
Jiynǧa «Tasqyn suǧa tas tüiın daiynbyz» degen Tötenşe jaǧdailar ministrı Şyŋǧys Ärınov kelmei, onyŋ orynbasary Bauyrjan Syzdyqov jauap berdı. Jurnalister vise-ministrge «Sız «Qūdaiǧa şükır, adam şyǧyny joq» dep rahmet aityŋdar degen sekıldı aityp otyrsyz ǧoi. Abai oblysyna qarasty Aiagöz audanynda traktordyŋ üstıne 10 saǧat otyryp, ekı azamat suǧa aǧyp kettı. Qazır olardyŋ denesın taba almai jatyr. On saǧat boiy qūtqaruǧa bara almaularyŋyzdyŋ sebebı nede?» dep sūraq qoidy.
- Bırınşıden, men adam şyǧyny joq dep aitqan kezde, bızge raqmet aityŋyzdar nemese marapatttaŋyzdar degen maqsatta aitqan joqpyn. Men raqmet alu üşın, halyq alǧys aitsyn dep aitpadym. Şükır dep aitu kerek dep şyn jürekten aityp otyrmyn,- deidı ol.
- Ekınşıden, traktorden ekı adamnyŋ joǧaluy su tasqynyna bailanysty emes. Ony bız dūrys tüsınuımız kerek. Olar joldy qysqartu üşın tasyp jatqan özenge özderı kırıp ketken. Demek, ol sudyŋ ortasynda bırden qalyp ketken joq. Özı joldy qysqartu üşın özı kırıp otyr. Bız dūrys tüsınuımız kerek. “On saǧat” dep ūlǧaitylǧan. Ol jerde on saǧat ötken joq. Orysşa aitqanda “u straha glaza veliki» deidı ǧoi. Mysaly, köp jerde ört bolǧan kezde, azamattar “ört söndıru kölıgı keşıgıp kelıp jatyr” deidı. Al, şyndyǧynda sanauly sekundtar ötıp jatady. Būl jerde de sondai närse. Bızdıŋ ol jerge keş jetkenımızdıŋ sebebı, bükıl özenderdıŋ boiymen sulardyŋ közderınde bızdıŋ qūtqaruşylar tūrǧan joq. Oǧan uaqyt kerek. Sondyqtan, bız ol jerge eŋ jaqyn jerdegı qūtqaruşylarymyzdy jıberdık. Sodan keiın, osyndai jaǧdai boldy, - deidı Tötenşe jaǧdai vise-ministrı Bauyrjan Syzdyqov.
Sondai-aq vise-ministr tıkūşaqpen qauıptı aimaqqa baratyn kezde ūşqyştyŋ qauıpsızdıgın oilau kerek ekenın eskerttı.
- Mysaly, eger şeteldık täjıribenı alatyn bolsaq, Europada örtenıp jatqan üidıŋ ışıne ört söndıruışı kırmeidı. Bırınşı ol özınıŋ qauıpsızdıgın oilaidy. Tünde tıkūşaqpen ūşqan ūşqyştyŋ qauıpsızdıgın de oilauymyz kerek. Ol jerde qara tünek, eşteŋe körınbeidı. Osyndai qiyndyqtar bolyp jatyr. Bügıngı taŋda qūtqaru jūmystar der kezınde atqarylyp jatyr, - degen vise-ministr ūzaǧynan aqtaldy.
- Al, jaŋaǧy ekı kısınıŋ suǧa ketkenı su tasqynyna bailanysty emes. Bızdıŋ halyq «Ot pen su — tılsız jau» deidı. Bız tılsız jaudyŋ bıreuı su tasqynymen küresıp jatyrmyz. Jazda örtpen küresemız. Tılsız jaumen tek qana qūtqaruşylar men memlekettık organdar kürespeuı kerek. Tılsız jaumen azamattarymyz da kürese bıluı qajet. Eger tasyp jatqan su bolsa, bızdıŋ azamattarymyz ol suǧa kırmeu kerek. Onyŋ küresı sonda. Eŋ bırınşı adam özınıŋ qauıpsızdıgın oilau kerek. Men ony nege aityp jatyrmyn? Erteŋ Qazaqstannyŋ bolaşaǧyn qūratyn jastar men öskeleŋ ūrpaq ony dūrys tüsınuı qajet. Olar traktordaǧy ekı azamat siiaqty tasqynǧa baryp kırmeuı kerek. Sol üşın aityp jatyrmyn, - dedı Tötenşe jaǧdai vise-ministrı Bauyrjan Syzdyqov.
Ūqsas jaŋalyqtar
