قازاقستان سىرتقى ىستەر مينيسترلىگى رەسەيدە جۇرگەن وتانداستارعا جەكە قۇجاتتارىن وزىمەن بىرگە الىپ جۇرۋگە كەڭەس بەردى. بۇل تۋرالى ءسىم رەسمي وكىلى ايبەك سمادياروۆ بريفينگتە ايتتى، دەپ حابارلايدى “ادىرنا” ۇلتتىق پورتالى.
"ازاماتتارىمىزدىڭ وزىمەن بىرگە جەكە قۇجاتتارى جانە سول ەلدە بولۋ ماقساتى بولعانى دۇرىس. ازىرگە ءبىزدىڭ ەلشىلىككە بىرەۋدى ۇستادى، زاڭسىز ۇستاپ وتىر دەگەن شاعىمدار تۇسكەن جوق. ەگەر قانداي دا ءبىر تەكسەرىستەر بولسا، بۇل جاي عانا تەكسەرىس", - دەيدى ايبەك سمادياروۆ.
ايتۋىنشا، رەسەيدە قاۋىپسىزدىكتى كۇشەيتۋ بويىنشا قابىلدانعان شارالار – قالىپتاسقان جاعدايدا قالىپتى پراكتيكا.
ء"وز اۋماعىندا ءىرى تەراكت بولعان كەز كەلگەن مەملەكەت قاۋىپسىزدىكتى قامتاماسىز ەتۋ ءۇشىن شارالار قابىلدايدى، ارينە. جەرگىلىكتى بيلىك تە، سونىڭ ىشىندە قۇقىق قورعاۋ ورگاندارى دا قاجەتتى شارالاردى قولعا الادى. سول سەبەپتى بىرەۋدى ۇستادى جانە تەكسەرىپ جاتىر دەگەن جاڭالىقتار – قالىپتى جاعداي", - دەپ ءتۇسىندىردى سمادياروۆ.
ەستەرىڭىزگە سالايىق، 22 ناۋرىزدا ماسكەۋ ماڭىنداعى كراسنوگورسك قالاسىنداعى "كروكۋس سيتي حوللدا" بەتپەردە كيگەن بەلگىسىز ادامدار كونتسەرت الدىندا كورەرمەندەرگە وق اتقان بولاتىن. تەراكت سالدارىنان قازا بولعاندار سانى 140 ادامنان استى.