بۇگىن - بەلگىلى قالامگەر، قازاقستان رەسپۋبليكاسى مەملەكەتتىك سىيلىعىنىڭ يەگەرى، جازۋشى، تۇركىتانۋشى قويشىعارا سالعاراۇلى 85 جاسقا تولدى.
قويشىعارا سالعاراۇلى 1939 جىلى 1 ساۋىردە تورعاي وبلىسىنىڭ كوكالات اۋىلىندا دۇنيەگە كەلگەن. ەڭبەك جولىن شوپاندىقتان باستاعان ول، قازمۋ-ءدىڭ فيلولوگيا فاكۋلتەتى جۋرناليستيكا ءبولىمىن بىتىرگەن سوڭ، 1964–1965 جىلدارى «اۋىل ءومىرى» گازەتىنىڭ رەداكتورى، 1965–1971 جىلدارى قازاق راديوسىنىڭ قوستاناي وبلىسىنداعى مەنشىكتى ءتىلشىسى، 1971–1975 جىلدارى تورعاي وبلىستىق تەلەراديو كوميتەتىنىڭ رەداكتورى بولعان. 1975–1990 جىلدارى «ەگەمەن قازاقستان» گازەتىندە ءتىلشى، ءبولىم مەڭگەرۋشىسى، 1990–1993 جىلدارى ادەبيەت جانە ونەر ينستيتۋتىندا قىزمەتكەر. 1993–1997 جىلدارى قر مەملەكەتتىك حاتشىسىنىڭ كەڭەسشىسى، مەملەكەتتىك ساياسات جونىندەگى ۇلتتىق كەڭەس حاتشىسىنىڭ ورىنباسارى، حاتشىسى، 1997 جىلى قازاقستان رەسپۋبليكاسىنىڭ قحر-داعى ەلشىلىگىندە مادەنيەت جونىندەگى كەڭەسشى قىزمەتتەرىن اتقارعان. قحر-دا ءجۇرىپ «سيۋڭنۋ»، «دۋڭحۋ. گاۋچى»، «100 قۇجات»، «تانىم تارماقتارى»، «انىقتامالىق» اتتى كىتاپتارىن جازدى.
«التىن تامىر»، «كومبە»، «قازاقتىڭ قيلى تاريحى»، «قازاقتار» رومان-ەسسە، «قازاق قازاق بولعانعا دەيىن»، «قازاق قازاق بولعاننان كەيىن» دەگەن ءىى تومدىق روماندارى جارىق كوردى.
1996 جىلى «قازاقتار» تريلوگياسى ءۇشىن قر مەملەكەتتىك سىيلىعىنىڭ لاۋرەاتى اتاندى. قازاقستان رەسپۋبليكاسىنىڭ ەڭبەك سىڭىرگەن قايراتكەرى. ەكى رەت مەدالمەن جانە قازاق كسر جوعارعى كەڭەسىنىڭ قۇرمەت گراموتاسىمەن ماراپاتتالعان.
شىعارمالارى: ىلگەشەك. سىقاق ولەڭدەرى. ا.، «جازۋشى»، 1966; سول ءبىر كۇندەر. پوۆەستەر مەن اڭگىمەلەر. ا.، «جالىن»، 1976; ۇبەدەي. پوۆەستەر مەن اڭگىمەلەر. ا.، «جالىن»، 1978; سوقپاق جولعا باستايدى. پوۆەستەر مەن اڭگىمەلەر. ا.، «جالىن»، 1980; تاعدىرلار توعىسى. اڭگىمەلەر مەن پوۆەستەر. ا.، «جالىن»، 1984.
