Búgin - belgili qalamger, Qazaqstan Respýblıkasy Memlekettik syılyǵynyń ıegeri, jazýshy, túrkitanýshy Qoıshyǵara Salǵarauly 85 jasqa toldy.
Qoıshyǵara Salǵarauly 1939 jyly 1 sáýirde Torǵaı oblysynyń Kókalat aýylynda dúnıege kelgen. Eńbek jolyn shopandyqtan bastaǵan ol, QazMÝ-diń fılologııa fakýlteti jýrnalıstıka bólimin bitirgen soń, 1964–1965 jyldary «Aýyl ómiri» gazetiniń redaktory, 1965–1971 jyldary Qazaq radıosynyń Qostanaı oblysyndaǵy menshikti tilshisi, 1971–1975 jyldary Torǵaı oblystyq teleradıo komıtetiniń redaktory bolǵan. 1975–1990 jyldary «Egemen Qazaqstan» gazetinde tilshi, bólim meńgerýshisi, 1990–1993 jyldary Ádebıet jáne óner ınstıtýtynda qyzmetker. 1993–1997 jyldary QR Memlekettik hatshysynyń keńesshisi, memlekettik saıasat jónindegi ulttyq keńes hatshysynyń orynbasary, hatshysy, 1997 jyly Qazaqstan Respýblıkasynyń QHR-daǵy Elshiliginde mádenıet jónindegi keńesshi qyzmetterin atqarǵan. QHR-da júrip «Sıýńný», «Dýńhý. Gaýchy», «100 qujat», «Tanym tarmaqtary», «Anyqtamalyq» atty kitaptaryn jazdy.
«Altyn tamyr», «Kómbe», «Qazaqtyń qıly tarıhy», «Qazaqtar» roman-esse, «Qazaq qazaq bolǵanǵa deıin», «Qazaq qazaq bolǵannan keıin» degen II tomdyq romandary jaryq kórdi.
1996 jyly «Qazaqtar» trılogııasy úshin QR Memlekettik syılyǵynyń laýreaty atandy. Qazaqstan Respýblıkasynyń eńbek sińirgen qaıratkeri. Eki ret medalmen jáne Qazaq KSR Joǵarǵy Keńesiniń Qurmet Gramotasymen marapattalǵan.
Shyǵarmalary: Ilgeshek. Syqaq óleńderi. A., «Jazýshy», 1966; Sol bir kúnder. Povester men áńgimeler. A., «Jalyn», 1976; Úbedeı. Povester men áńgimeler. A., «Jalyn», 1978; Soqpaq jolǵa bastaıdy. Povester men áńgimeler. A., «Jalyn», 1980; Taǵdyrlar toǵysy. Áńgimeler men povester. A., «Jalyn», 1984.
