ءوز ايەلىن ءولتىردى دەپ سوتقا تارتىلعان قۋاندىق بيشىمباەۆتىڭ جانە ونىڭ تۋىستارىنىڭ مۇلكىن تاركىلەۋدى تالاپ ەتەتىن پەتيتسيا جاريالاندى، دەپ حابارلايدى “ادىرنا” ۇلتتىق پورتالى.
ء“بىز بىرگەمىز” كونسۋلتاتيۆتىك-سيتۋاتسيالىق ورتالىقتىڭ باستاۋىمەن بيشىمباەۆتاردىڭ تابىسىن تەكسەرىپ، مۇلكىن تاركىلەۋ ۇسىنىلدى. بەلسەندىلەر جاعدايعا پرەزيدەنتتىڭ ارالاسۋىن سۇرايدى.
“ۋاكىلەتتى ورگاندارعا نۇسقاۋ بەرىپ، وتباسىنىڭ بارلىق مۇلكىنە جەدەل تەكسەرۋ جۇرگىزۋ قاجەت. اسا قاتىگەزدىكپەن كىسى ءولتىردى دەگەن كۇدىكپەن قازىر سوتقا تارتىلعان بيشىمباەۆ بۇرىن مينيستر بولىپ جۇمىس ىستەگەن كەزىندە سىبايلاس جەمقورلىق قىلمىستارى ءۇشىن سوتتالعانىن بىلەمىز. اشىق دەرەككوزدەردەن بەلگىلى بولعانداي، جەمقور شەنەۋنىكتىڭ اناسى ءالى كۇنگە دەيىن ءارتۇرلى كومپانيالاردا ءىرى بيزنەس اكتيۆتەرىنە يە. بۇل سوتتالعان جەمقور شەنەۋنىكتىڭ ۇكىمدى ورىنداۋدان جانە مۇلكىن تاركىلەۋدەن جالتارىپ ۇلگەرگەنىن كورسەتەدى”، – دەلىنگەن پەتيتسيادا.
ولار ءالميرا نۇرلىبەكوۆانىڭ 2005-2016 جىلدارى يەلەنگەن اكتيۆتەرىنىڭ زاڭدىلىعىنا كۇمانمەن قارايدى. ءۇي شارۋاسىندا بولعان اناسىنىڭ، ۇستازدىقپەن اينالىسقان اكەسى ءۋاليحان بيشىمباەۆتىڭ مۇنداي بايلىعىنىڭ بولۋى سەنىمسىز دەيدى ولار.
“بيشىمباەۆ ءوز بايلىعىنىڭ مۇمكىندىكتەرىن شەكسىز پايدالانىپ جاتىر. ونى قورعايتىن ادۆوكاتتاردىڭ سانى وننان استى. ولاردىڭ اراسىندا تەرگەۋ انىقتاعان ايعاقتاردى بۇرمالاعىسى كەلگەندەر دە بولدى. اتالعان زاڭگەرلەر نۇكەنوۆتەر وتباسىنىڭ سەزىمىن، جالپى ادامزاتتىق قۇندىلىقتاردى اسىرا سىلتەپ، نۇكەنوۆانىڭ وبرازىن جامان ەتىپ كورسەتىپ، ساديستىك قىلمىس جاسادى دەگەن كۇدىككە ىلىنگەن ادامدى اق ەتىپ شىعارۋعا ۇمىتىپ وتىر” – دەدى بەلسەندىلەر.
پەتيتسيا اۆتورلارى بيشىمباەۆتىڭ مۇلكىن تاركىلەۋگە قاتىستى بۇرىن شىعارىلعان ۇكىم تولىق ورىندالۋىن تالاپ ەتتى. تالاپتار ەلەنبەگەن جاعدايدا جالپىحالىقتىق نارازىلىق اكتسيالارىن وتكىزۋگە جانە ميتينگىگە شىعۋعا قۇقىلى ەكەندەرىن ەسكەرتتى.
پەتيتسياعا 61 مىڭنان استام ادام قول قويعان.
ايتا كەتەيىك، بۇگىن بيشىمباەۆ ءىسى بويىنشا 3-سوت وتىرىسى ءوتىپ جاتىر. سۋديا بيشىمباەۆتان سوت بارىسىندا جاۋاپ الۋعا رۇقسات بەردى. ەكس-مينيستر، كنشىرىم سۇرادى، بىراق كىناسىن مويىندامادى.
