ايەلىن قاتىگەزدىكپەن ءولتىردى دەپ ايىپتالعان قازاقستاننىڭ بۇرىنعى ۇلتتىق ەكونوميكا ءمينيسترى قۋاندىق بيشىمباەۆقا سوت ۇكىمى شىقتى. ول 24 جىلعا باس بوستاندىعىنان ايىرىلدى، دەپ حابارلايدى “ادىرنا” ۇلتتىق پورتالى.
قۋاندىق بيشىمباەۆتىڭ سوتى بويىنشا القابيلەر ۇكىم شىعاردى.
بيشىمباەۆقا ەكى باپ بويىنشا ايىپ تاعىلدى: اسا قاتىگەزدىكپەن كىسى ءولتىرۋ (15 جىلدان 20 جىلعا دەيىن نەمەسە ءومىر بويىنا باس بوستاندىعىنان ايىرۋ); قيناۋ (4 جىلدان 7 جىلعا دەيىن باس بوستاندىعىن شەكتەۋ نەمەسە وسى مەرزىمگە باس بوستاندىعىنان ايىرۋ).
ال باقىتجان بايجانوۆ قىلمىستىق كودەكستىڭ 432-بابى بويىنشا كىنالى دەپ تانىلدى، ول 4 جىلعا باس بوستاندىعىنان ايىرىلدى.
ەسكە سالايىق، 2023 جىلدىڭ 9 قاراشاسىندا استانا مەيرامحانالارىنىڭ بىرىندە قايعىلى جاعداي بولىپ، بۇرىنعى ۇلتتىق ەكونوميكا ءمينيسترى قۋاندىق بيشىمباەۆتىڭ ايەلى سالتانات نۇكەنوۆا قايتىس بولدى. سول وقيعادان كەيىن بيشىمباەۆ قاماۋعا الىندى. ارتىنشا ونىڭ تۋىسى باقىتجان بايجانوۆ تا قامالدى.
