قر ادىلەت ءمينيسترى ازامات ەسقاراەۆ بريتاندىق ساياساتكەر مارگارەت تەتچەرگە تيەسىلى «دوستىق» وردەنىنىڭ ساتىلۋى جونىندە پىكىر ءبىلدىردى. بۇل تۋرالى مينيستر م. نارىكباەۆ اتىنداعى ۋنيۆەرسيتەتتە تىلشىلەرگە بەرگەن سۇحباتىندا ايتتى، دەپ حابارلايدى “ادىرنا” ۇلتتىق پورتالى.
«بۇل اقپاراتتان حاباردارمىز. ارينە، ءبىزدىڭ زاڭناما بويىنشا مەملەكەتتىك ناگرادالاردى ساتۋعا بولمايدى. بۇل ءۇشىن ءبىزدىڭ قىلمىستىق كودەكستە جاۋاپكەرشىلىك بار. ەگەر ادام مەملەكەتتىك ناگرادالاردى ساۋدالاسا، ءتيىستى جاۋاپكەرشىلىككە تارتىلادى. مارگارەت تەتچەر تاريحي تۇلعا بولعاندىقتان، ولاردىڭ جەكە زاتتارىن، قۇجاتتارى مەن حاببارىن اۋكتسيونعا شىعارۋ تاجىريبەسى بار. بۇل ولاردىڭ مادەنيەتىنىڭ ءبىر بولىگى»، — دەدى مينيستر م. نارىكباەۆ اتىنداعى ۋنيۆەرسيتەتتە تىلشىلەرگە بەرگەن سۇحباتىندا.
تىلشىلەر مينيستردەن ءدال وسى وقيعا بويىنشا تەكسەرۋ جۇرگىزۋ مەن جاۋاپقا تارتۋ شارالارى جۇرگىزىلە مە دەپ سۇرادى.
ءوز كەزەگىندە ا. ەسقاراەۆ بۇل سۇراق سىرتقى ىستەر جانە مادەنيەت مينيسترلىكتەرىنىڭ قۇزىرەتىندە ەكەنىن ايتتى.
بۇعان دەيىن باق بەتتەرىندە مارگارەت تەتچەرگە تابىستالعان «دوستىق» وردەنىنىڭ ساتىلىمعا شىعارىلعانى حابارلانعان ەدى.
حابارلاندىرۋ سيرەك جانە كونە كىتاپتار مەن زاتتاردى ساتۋعا ارنالعان ينتەرنەت-دۇكەندەردىڭ بىرىندە جاريالاندى. وردەن شامامەن 7,9 ملن تەڭگەگە باعالانىپ وتىر.
بۇل ماراپات مارگارەت تەتچەرگە 2001 جىلى قازاقستان مەن ۇلىبريتانيا اراسىنداعى قارىم-قاتىناستاردى دامىتۋعا قوسقان ۇلەسى ءۇشىن بەرىلگەن.
