ارىس قالاسىندا بىردە-ءبىر بالاباقشا جۇمىس ىستەپ تۇرعان جوق. جارىلىس كەزىندە ءبىلىم وشاقتارى عيماراتتارىنىڭ بارلىعىنا دا زاقىم كەلگەن. بۇل تۋرالى قالا اكىمى مۇرات قادىربەكتىڭ قاتىسۋىمەن وتكەن بريفينگتە ايتىلدى.
«جارىلىستان ءوز ۇيىمە دە زاقىم كەلدى» دەگەن ارىس قالاسىنىڭ اكىمى الدىمەن حالىقتىڭ باسپاناسىن جوندەپ بەرۋگە جاعداي جاساماق ەكەن. تىلشىلەردى قۇرىلىس بارىسىمەن تانىستىرعان مۇرات قادىربەك قازىر 700 — دەن استام ءۇيدىڭ جوندەلىپ جاتقانىن جەتكىزدى. 180 باسپانا قالپىنا كەلتىرىلگەن. جارىلىس كەزىندە قالاداعى 30 بالاباقشانىڭ بارلىعى بۇلىنگەن. بيلىك وكىلدەرى 10 كۇن ىشىندە سونىڭ جارتىسىن ىسكە قوسامىز دەپ ۋادە ەتتى.
سۇمدىق جارىلىستان حالىق تەك باسپانالارىنان عانا ەمەس مال-مۇلكىنەن دە ايىرىلدى. الايدا شەنەۋنىكتەر مۇلكىن وتەپ بەرمەسەك تە تۇرعىنداردىڭ كۇنكورىسىنە جاراپ تۇرعان مال شارۋاشىلىعىن رەتتۋگە قولعابىس جاسايمىز دەپ وتىر.
ال وتەماقى رەتىندە بەرىلەتىن 100 مىڭ تەڭگە ءالى جىر بولماسا دەڭىز. سەبەبى، وسىعان دەيىن قاراجاتتى الۋ ءۇشىن «تۇرعىندارعا ەشقايدا بارىپ، قۇجات جيناۋدىڭ قاجەتى جوق» دەگەن اتقامىنەرلەر حالىقتى ابىگەر ەتۋگە ءماجبۇر ەكەن.
وتەماقى جارىلىس كەزىندە زارداپ شەككەن قالاعا جاپسارلاس ورنالاسقان اۋىلدىق ەلدىمەكەن تۇرعىندارىنا دا تيەسىلى. قۇجات قابىلداۋ مەرزىمى شەكتەۋسىز. تۇرعىندار كەز-كەلگەن ۋاقىتتا كومەككە يەك ارتا الادى. تەك ارىستا تۇرعىلىقتى تىركەۋدە بولۋ كەرەك.
ماقپال رىسباەۆا
"ادىرنا" ۇلتتىق پورتالى
