اتىراۋ وبلىسىنداعى تاعى ءبىر اۋىلدا توتەنشە جاعداي جاريالاندى، دەپ حابارلايدى "ادىرنا" ءتىلشىسى.
قىزىلقوعا اۋدانىنىڭ ورتالىعى – ميالى اۋىلىنا ويىل وزەنىنەن تاسقىن سۋ كىرۋ قاۋپى تۋىنداعان. سايكەسىنشە ايماقتا توتەنشە جاعداي جاريالانىپ، اۋىل تۇرعىندارىن قاۋىپسىز جەرگە كوشىرۋگە شەشىم قابىلداندى.
قىزىلقوعا اۋدانى اكىمدىگى اۋىل تۇرعىندارىن ەۆاكۋاتسيالاۋ ءۇشىن ى.شورەكوۆ اتىنداعى ورتا مەكتەپ-گيمنازيا، ح.دوسمۇحامەدوۆ اتىنداعى ورتا مەكتەپ پەن «نۇر-شۋاق» بالاباقشاسى دايىن تۇرعانىن جەتكىزدى.
«تۇرعىنداردان اۋدان اكىمدىگى، «ارمان» مادەنيەت ءۇيى مەن «جاڭا ارنا» مەكەمەسىنىڭ عيماراتىنا جينالۋ سۇرالادى. ءبىرىنشى كەزەكتە ايەلدەر، بالالار، ناۋقاس ادامدار، I, II, III- توپتاعى مۇگەدەكتەر كوشىرىلەدى»، - دەپ حابارلادى اۋداندىق اكىمدىكتەن.
