كوپتوعايداعى شەكارا قورشاۋىن جىلجىتۋ ۋاقىتشا توقتاتىلماق. بۇل تۋرالى قر ۇلتتىق قاۋىپسىزدىك كوميتەتى شەكارا قىزمەتىنىڭ اتىراۋ وبلىسى بويىنشا دەپارتامەنتىنىڭ ءباسپاسوز قىزمەتى مالىمدەدى.
اتىراۋ وبلىسى، قۇرمانعازى اۋدانى، كوپتوعاي اۋىلىندا ورىن الىپ جاتقان جاعدايعا تۇسىنىك بەرگەن قر ۇلتتىق قاۋىپسىزدىك كوميتەتى شەكارا قىزمەتىنىڭ اتىراۋ وبلىسى بويىنشا دەپارتامەنتى وكىلى ارداق امىرعاليەۆتىڭ مالىمدەۋىنشە، قيعاش جاعالاۋىندا 1995- 1996 جىلى ۋاقىتشا تۇرعىزىلعان شەكارالىق قورشاۋدى جىلجىتۋ ماسەلەسى جەرگىلىكتى تۇرعىندار اراسىندا تۇسىنىسپەۋشىلىك تۋدىرعان.
اڭگىمە 2005 جىلعى 18 قاڭتاردا ماسكەۋدە قول قويىلعان “قازاقستان-رەسەي مەملەكەتتىك شەكاراسى تۋرالى كەلىسىمىنە” بايلانىستى تۋىنداپ وتىر.
دەماركاتسيا ءبىر جىلدا بىتپەيتىن ۇزاق مەرزىمدى پروتسەسس، قازىرگى تاڭدا ول جۇمىستار اياقتالعان جوق. دەماركاتسيا كەزىندە وتكەن جىلى قازاقستاندىق جانە رەسەيلىك جۇمىس توبى 1995- 1996 جىلى ۋاقىتشا تۇرعىزىلعان شەكارالىق قورشاۋدىڭ رەسەي فەدەراتسياسىنا تيەسىلى تەرريتوريادا ورنالاسقانىن انىقتاعان ەدى.
قورشاۋدىڭ شامامەن ۇزىندىعى 1500 مەتر، تەرەڭدىگى 10-70 مەتر ارالىعىندا (جارتى ارال ىسپەتتى). 2005 جىلعى 18 قاڭتارداعى ەكى ەل اراسىنداعى كەلىسىمگە سايكەس، قورشاۋ تيەسىلى ورىندا ورناتىلۋى ءۇشىن، ونى قازاقستاندىق تەرريتورياعا قاراي جىلجىتۋ قاجەت. قازاقستاندىق شەكاراشىلار كۇنى بۇگىنگە دەيىن وسى ماسەلەمەن اينالىسىپ كەلدى.
الايدا، جەرگىلىكتى تۇرعىندار جاعدايدى باسقاشا قابىلداپ، شەكاراشىلار ورناتىپ جاتقان قورشاۋعا قارسىلىق ءبىلدىرىپ وتىر.
ماسەلە ەكى مەملەكەت اراسىندا كەلىسىلگەن نورماتيۆتىك قۇجاتتا كورسەتىلگەن قورشاۋعا بايلانىستى بولىپ وتىر. جانە قورشاۋ ۇزىندىعى 1500 مەتر ۋچاسكەگە بايلانىستى. بۇل جەردە قازاقستاندىق تەرريتوريانى رەسەيگە بەرۋ دەگەن ماسەلە جوق» دەپ ناقتىلادى سپيكەر.
ونىڭ ۇستىنە، ەگەر، اتالعان ۋچاسكە شارۋاشىلىق نەمەسە باسقا ماقساتتاعى جەر بولسا، دەماركاتسيا پروتسەسىندە مۇنداي ماسەلەنى ەكىجاقتى كەلىسىم ارقىلى شەشۋگە بولادى. حالىقارالىق قاتىناستاردا بۇل كەڭىنەن تاراعان تاجىريبە، ول ءۇشىن بەلگىلى ءبىر قۇقىقتىق پروتسەدۋرالاردى جۇزەگە اسىرۋ كەرەك. جانە ول ماسەلەلەر جەرگىلىكتى اتقارۋشى ورگاندار (اكىمدىك), ۇكىمەت، سىرتقى ىستەر مينيسترلىگى ارقىلى شەشىلەدى.
19 ساۋىردەن باستاپ كوپتوعاي سەلوسىنداعى ۋچاسكەدە قورشاۋدى جىلجىتۋ جۇمىستارى جاعداي رەتتەلگەنگە دەيىن ۋاقىتشا توقتاتىلادى.
