29 ناۋرىز كۇنى بۇرىنعى ۇلتتىق ەكونوميكا ءمينيسترى قۋاندىق بيشىمباەۆقا قاتىستى سوت وتىرىسى ءوتتى، دەپ حابارلايدى "ادىرنا" ءتىلشىسى.
مارقۇم سالتانات نۇكەنوۆانىڭ ادۆوكاتى جاننا ورازباقوۆا الەۋمەتتىك جەلىدە سوت وتىرىسى تۋرالى جازدى. ول سوت بارىسىندا ءوزىنىڭ قورعاۋىنداعى جابىرلەنۋشى نۇكەنوۆتاردىڭ سۇراقتارى نەگىزسىز الىپ تاستالعانىن ايتادى.
"وتە ۇزاق كۇن بولدى… سالتانات نۇكەنوۆانىڭ ولىمىنە قاتىستى ءىس بويىنشا سوت كۇنى بويىنا، از عانا ۋاقىت تۇسكى ۇزىلىسپەن ساعات 10.00-دەن 18.30-عا دەيىن سوزىلدى. سوت ىسكە تىكەلەي قاتىسى بار سۇراقتارىمىزدى نەگىزسىز الىپ تاستادى. بىراق ءبىزدىڭ كليەنتىمىزدەن جاۋاپ الۋ كەزىندە ءبىز الىپ تاستاۋدى سۇراعان ورىنسىز سۇراقتار الىپ تاستالمادى، - دەپ جازدى ول نۇكەنوۆانىڭ اعاسى ايتبەك امانگەلدى تۋرالى ايتىپ.
ادۆوكاتتىڭ سوزىنشە سوت بويى جاۋاپ الىنعاندار تەرىس قاراپ تۇرعان.
ء"بىز بۇكىل پروتسەسس بويى جاۋاپ الىنعان ادامداردىڭ ارقاسىن كورىپ وتىردىق. ولارعا دۇرىستاپ قاراپ، سۇراقتار قويۋعا مۇمكىندىگىمىز بولمادى. القابيلەر دە ولاردىڭ ەموتسياسىن كورە المادى، ويتكەنى ولار القابيلەرگە دە تەرىس قاراپ تۇردى. پروتسەستىڭ باسىندا ءبىز دۇرىستاپ جاۋاپ الۋ جانە جۇمىس ىستەۋ ءۇشىن تريبۋنانى جىلجىتۋدى سۇرادىق، بىراق اياقتالعانشا سولاي وتىردىق", - دەيدى ول.
سوت وتىرىسىندا قىلمىس بولعان BAU مەيرامحاناسىندا بارمەن بولىپ جۇمىس ىستەيتىن كۋاگەردەن دە جاۋاپ الىنعان.
"ساعات 19.00 شاماسىندا بايجانوۆ تەلەفونىما حابارلاسىپ، BAU مەيرامحاناسىنا كوتەرىلۋىمدى سۇرادى. نە ءۇشىن ەكەنىن بىلمەيمىن. "تەز كوتەرىل" دەدى. مەن بىردەن سول جاققا باردىم. ليفتكە كىرسەم، جەدەل جاردەم بولدى. قۋاندىق ءۋاليحانۇلى قولىنا پىشاق ۇستاپ ءجۇردى. ول دارەتحانا جاققا پىشاقپەن كىرىپ كەتتى. ءبىز قاتتى قورقىپ كەتتىك، ارتىنان ەردىك. ودان پىشاقتى الىپ، پوليتسيا كەلگەنشە كۇتتىك. 15-20 مينۋتتا پوليتسيا كەلدى", - دەدى بارمەن.
ەسكە سالا كەتەيىك، ەكس-مينيستر قۋاندىق بيشىمباەۆ سوتتا ايەلى سالتانات نۇكەنوۆانى اسا قاتىگەزدىكپەن ولتىرگەنىن مويىنداماعان بولاتىن.
