جاركەنت گارنيزونىندا 26 جاستاعى ينجەنەرلىك قىزمەت كاپيتانى دارحان داۋلەتتىڭ ولىمىنە قاتىستى سوت پروتسەسى ءوتىپ جاتىر، دەپ حابارلايدى "ادىرنا" ۇلتتىق پورتالى Orda.kz-كە سىلتەپ.
قايعىلى وقيعا 2024 جىلدىڭ قاراشا ايىندا بولعان. تەرگەۋ مالىمەتىنشە، №74261 اسكەري ءبولىمىنىڭ بارلاۋ-شابۋىل باتالونىنىڭ ساربازدارى كاپيتاندى "بوگدە ادام" دەپ قابىلداپ، ونى ۇرىپ-سوعىپ، تۇنشىقتىرىپ، سپورت الاڭىنا اپارىپ، قاراۋسىز قالدىرعان. كەيىن وفيتسەردىڭ دەنەسى تابىلىپ، مەديتسينالىق ساراپتاما ونىڭ تۇنشىعۋ سالدارىنان كوز جۇمعانىن انىقتاعان.
سوتتا بەلگىلى بولعانداي، ساربازدارعا بۇل تاپسىرمانى باتالون كومانديرى، مايور دارحان قازتاي بەرگەن. ول جوعارى باسشىلىقپەن كەلىسپەي، ساربازدارعا كەز كەلگەن ادامدى ۇستاۋدى جانە قارسىلاسقان جاعدايدا كۇش قولدانۋدى بۇيىرعان. ساربازداردىڭ ايتۋىنشا، ولار ارەكەتتەرىنىڭ سالدارىن تولىق تۇسىنبەگەن جانە قاساقانا ءولتىرۋ نيەتتەرى بولماعان.
مەملەكەتتىك ايىپتاۋشىلار مايور قازتايعا 16 جىل، ءۇش ساربازعا 12-13 جىلعا دەيىن باس بوستاندىعىنان ايىرۋ جازاسىن سۇراپ وتىر.
وقيعانىڭ سالدارىنان ءبولىم كومانديرى ەرنات تولەۋعۇلوۆ قىزمەتىنەن بوساتىلدى. بىرنەشە وفيتسەر اۋىستىرىلدى، سونداي-اق قۇرلىق اسكەرلەرىنىڭ باس قولباسشىسى، گەنەرال-مايور اسان ءجۇسىپوۆ تە ورنىنان كەتتى.
اسكەري پروكۋرورلار بۇل قايعىلى جاعدايعا بولىمدەگى باقىلاۋدىڭ جوقتىعى، ءتارتىپتىڭ ساقتالماۋى جانە نەمقۇرايلىق سەبەپ بولعانىن اتاپ ءوتتى.
"اسكەر — زاڭ مەن ءتارتىپ ورنى. كومانديرلەردىڭ جاۋاپسىزدىعى مەن جۇيەدەگى ولقىلىقتار قايعىلى جاعدايعا ۇلاستى. ەندى سوت ءادىل شەشىم شىعارۋى ءتيىس", — دەلىنگەن حابارلامادا.
