كيىكتەردىڭ كەدەرگىسىز ورىستەۋى ءۇشىن ەكودۋكتار سالۋ ءتيىمسىز. بۇل تۋرالى ءماجىلىس دەپۋتاتتارىنىڭ ساۋالىنا پرەمەر-مينيستر ولجاس بەكتەنوۆتىڭ جاۋابىندا ايتىلعان، دەپ حابارلايدى “ادىرنا” ۇلتتىق پورتالى قپزاقپاراتقا سىلتەمە جاساپ.
«كيىكتەردىڭ پوپۋلياتسياسىن رەتتەۋ ماقساتىندا ەكولوگيا جانە تابيعي رەسۋرستار مينيسترلىگى عىلىمي قوعامداستىقپەن بىرلەسىپ، ولاردىڭ سانىن باقىلاۋدىڭ، ونىڭ ىشىندە ەكودۋكتار سالۋ ارقىلى تاريحي ورىستەۋ جولدارىن قالپىنا كەلتىرۋدىڭ بارلىق ىقتيمال تاسىلدەرىن قاراستىردى. ايتالىق، زەرتتەۋ بارىسىندا قىمبات ەكودۋكتار سالۋ كيىك پوپۋلياتسياسىنىڭ سانىنا اسەر ەتپەيتىنى انىقتالدى»،- دەدى ۇكىمەت باسشىسى جاۋابىندا.
ونىڭ اتاپ وتۋىنشە، بۇل شەشىم كيىكتەردىڭ جول ۇستىندەگى ەكودۋكتارمەن جانە جول استىنداعى وتكەلدەرمەن جۇرمەيتىنىمەن عىلىمي نەگىزدەلگەن. ويتكەنى ولار اشىق، تەگىس لاندشافتتاردا تىرشىلىك ەتەدى جانە بيىك قۇرىلىمداردان دا، ءارتۇرلى تۋننەلدەردەن دە قورقادى.
«وسىعان بايلانىستى كيىكتەردىڭ كەدەرگىسىز ورىستەۋى ءۇشىن ەكودۋكتار سالۋ ءتيىمسىز. ويتكەنى بۇل شارالار وڭ ناتيجە بەرمەيدى. ەكودۋكتاردىڭ ورنىنا، عىلىمي ۇيىمداردىڭ ۇسىنىمدارىنا سايكەس، ءتيىستى ەسكەرتۋ بەلگىلەرى مەن قورعاۋ قورشاۋلارىن ورناتا وتىرىپ، كيىكتەر ورىستەيتىن ۋچاسكەلەردە ەڭىس بەتكەيلەر سالۋ جوسپارلانۋدا»،- دەدى ولجاس بەكتەنوۆ.
