سەنات دەپۋتاتتارى پرەمەر-ءمينيستردىڭ اتىنا ساۋال جولداپ، 1980 جىلى سالىنعان بايقوڭىر ماڭىنداعى «يۋبيلەينىي» اەرودرومىن قازاقستاننىڭ كوممۋنالدىق مەنشىگىنە الىپ، ونىڭ بازاسىندا اۆيا وتىن قۇياتىن كەشەن قۇرۋدى ۇسىنعان بولاتىن. الايدا، بۇل باستاما ۇكىمەت تاراپىنان قولداۋ تاپپادى، دەپ حابارلايدى "ادىرنا" ۇلتتىق پورتالى.
پرەمەر-ءمينيستردىڭ جاۋابىندا «يۋبيلەينىي» اەرودرومى 1994 جىلدان بەرى رەسەي فەدەراتسياسىنا جالعا بەرىلگەن «بايقوڭىر» كەشەنىنىڭ قۇرامىنا كىرەتىنىن جانە قازىرگى ينفراقۇرىلىمنىڭ قاناعاتتانارلىقسىز ەكەنىن اتاپ ءوتتى.
اەرودرومنىڭ ۇشۋ-قونۋ جولاعى ۇزىندىعى 4,5 شاقىرىمدى، ەنى 84 مەتردى قۇرايدى، ال بەتون جابىندىسىنىڭ قالىڭدىعى 32 سانتيمەتر. كەزىندە بۇل اۋەايلاق 392 تونناعا دەيىنگى سالماقتاعى ۇشاقتاردى قابىلداي الاتىن ەدى. الايدا، 2020 جىلى رەسەي بۇل نىساندى وزدەرىنىڭ مەملەكەتتىك تىزىلىمىنەن شىعارىپ، ونىڭ جۇمىسى توقتاتىلعان. قازىرگى ۋاقىتتا اەرودرومنىڭ مارتەبەسى مەن مەنشىك يەسى بەلگىسىز.
پرەمەر-ءمينيستردىڭ ايتۋىنشا، اۋەايلاقتى قايتا ىسكە قوسۋ ءۇشىن اۋقىمدى ينفراقۇرىلىمدىق جاڭارتۋ جۇمىستارى قاجەت. وعان اۋەايلاق ينفراقۇرىلىمىن قالپىنا كەلتىرۋ، ارنايى تەحنيكا ساتىپ الۋ، جاڭا پەرسونال دايىنداۋ سياقتى كوپتەگەن قوماقتى قارجىلاي شىعىندار كەرەك.
سونداي-اق، ۇكىمەت باسشىسى اۆيا وتىن يمپورتىنىڭ ارتۋىنا جانە قازاقستانداعى ءىرى اۋەجايلاردىڭ جانارماي قۇيۋ كەشەندەرىن جاڭعىرتۋ جۇمىستارى جۇرگىزىلىپ جاتقانىن ەسكەرە وتىرىپ، «يۋبيلەينىي» اەرودرومىن اۆيا وتىن قۇيۋ ستانتسياسى رەتىندە پايدالانۋ ءتيىمسىز دەپ سانايدى.
"بايقوڭىر قالاسىنا جاقىن ورنالاسقان قىزىلوردا اۋەجايىنىڭ بار ەكەنىن جانە ەكسپورتتىق تاۋار ءوندىرىسىنىڭ بولماۋىن نازارعا الا وتىرىپ، «يۋبيلەينىي» اەرودرومىن مۋلتيمودالدى اۆياحاب رەتىندە پايدالانۋ قازىرگى ۋاقىتتا ءتيىمسىز دەپ ەسەپتەيمىز", — دەپ جازىلعان رەسمي جاۋاپتا.
