الماتىدا ەليتالىق تۇرعىن ءۇي كەشەنىنىڭ تۇرعىندارى كۇزەتشىنى كولىگىمەن جانىشتاپ، ارتىنشا ولىمشە ەتىپ ساباعان "كورشىنىڭ" ارەكەتىنە قاتىستى پىكىر ءبىلدىردى، دەپ حابارلايدى "ادىرنا" ءتىلشىسى كتك-عا سىلتەپ.
ۇلكەن مەگاپوليستىڭ قاق ورتاسىندا ورنالاسقان ەليتالىق تۇرعىن ۇيدە كۇزەتشى اياۋسىزدىقپەن ولتىرىلگەن. 42 جاستاعى نۇربول قايىپباەۆ العان جاراقاتتارى سالدارىنان اۋرۋحانادا كوز جۇمعان.
تۇرعىنداردىڭ ايتۋىنشا، قايعىلى وقيعاعا كۇزەتشى مەن كولىك يەسىنىڭ اراسىنداعى كيكىلجىڭ سەبەپ بولعان. كۇدىكتى كولىكتى ماس كۇيىندە ايداپ قالاعا شىعۋعا تىرىسپاق بولعان. الايدا كۇزەتشى وعان بۇل ارەكەتىنىڭ زاڭعى قايشى ەكەنىن تۇسىندىرۋگە تىرىسىپتى.
"ول شىعىپ كەتپەك بولدى. قاقپادان شىقپاق بولدى. نۇربول ونى توقتاتپاق بولدى. ەندى ماس ادام، جولعا شىقسا قانشا ادامدى ولتىرەدى. نۇربول انا جەرگە كولىگىن قوي دەدى دە، بارىپ شلاگباۋىمدى جاپتى، قاقپانىڭ بىرەۋىن جاۋىپ، ەكىنشىسىن جاۋىپ جاتقان كەزدە اناۋ قاتتى كەلىپ ءۇش رەت قاقتى. ونىڭ الدىندا سىرانىڭ شولمەگىمەن دۇڭگىرشەكتى شاقتى", - دەدى پاتەر يەلەرى كووپەراتيۆىنىڭ ديرەكتورى ءاليا دوسمايىلوۆا.
تۇرعىنداردىڭ سوزىنشە، ادام ءولتىردى دەگەن كۇدىككە ىلىنگەن ازامات اجىراسقان. ول "مەركۋر تاۋنلا" قارت اتا-اناسىمەن بىرگە تۇرادى. سونداي-اق تۇرعىندار ول كورشىنىڭ ءجيى جانجال شىعاراتىنىن ايتتى.
تەلەارنانىڭ ايتۋىنشا، مارقۇم نۇربول سول ءتۇنى اشۋعا بۋلىققان ەر ادامدى اتا-اناسىنىڭ ءوتىنىشى بويىنشا كوشەگە شىعارماعان بولۋى مۇمكىن.
"تەك وسى ءبىر ەر ادام عانا ۇنەمى شۋلاتىپ جۇرەدى. ناشاقور، ءىشىپ-شەگەدى. كەشە دە ءىشىپ-شەگىپ العان. وقيعا ءالى كوز الدىمىزدان كەتەر ەمەس. اسقان قاتىنگەزدىك قوي بۇل. كۇزەتشى نۇربول ۇنەمى كۇدىكتى ازاماتقا، ونىڭ وتباسىنا، بارىمىزگە كومەكتەسىپ جۇرەتىن. قاسكوي بۇعان دەيىن وسىنداعى ديسپەتچەرگە سوققى جاساعان. تالاي رەت پوليتسياعا جازعانبىز. اتا-اناسى مەملەكەتتىك قىزمەتتە جۇمىس ىستەگەن، بىلۋىمىزشە بۇرىنعى پروكۋرورلار. اتا-اناسى ونى ۇنەمى قورعاپ الىپ شىعادى", - دەدى دانەليا سارتاي.
كۇدىكتى ءوز ارەكەتىنەن سوڭ جوعارى قاباتتان دا سەكىرمەك بولىپتى. كورشىلەر ونىڭ ەسىرتكى قولداناتىنىن دا ايتتى.
"مىنا جاقتا وتىردى، اياعىن سالبىراتىپ. قۇلاي ما ەكەن دەپ مەن تاڭ قالىپ تۇردىم. ءبىرتۇرلى جىگىت. ەسىرتكى جاسىراتىندار كەلەتىن. مىنا قاقپانى ءبىز نە ءۇشىن قويدىردىق؟ ويتكەنى بالالاردىڭ ويىن الاڭىنا ەسىرتكى قويىپ كەتەدى. ونى شىعىپ الادى. ءار نارسەنى وعان اكەلەدى، كوپ بۇزاقىلىق جاسايدى. اتا-اناسىنا دا ءبىر قيىندىقتار تۋعىزادى. بۇكىل كورىشىلەر بىلەدى", - دەدى انار تەمىرقۇلوۆا.
ەسكە سالا كەتەيىك، كىسى قولىنان اسقان قاتىگەزدىكپەن قازا تاپقان كۇزەتشىنىڭ ارتىندا ايەلى مەن ءۇش بالاسى قالدى. نۇربول قايىپباەۆ وتباسىنىڭ جالعىز اسىرۋشىسى بولعان. اتالعان تۇرعىن ءۇي كەشەنىندە ول ەكى جىلدان بەرى 165 مىڭ تەڭگە ايلىققا جۇمىس ىستەپ كەلگەنى دە بەلگىلى بولدى.
