29 قازاندا تۇركىستان قالاسىندا «Olympic center» سپورت سارايىندا العاش رەت قازاقتىڭ ۇلتتىق كۇرەسىنەن وتكەن «Turan Barysy» ازيا كۋبوگىندە قازاقستان قۇراماسى جەڭىمپاز اتاندى، دەپ حابارلايدى “ادىرنا” ۇلتتىق پورتالى.
جارىسقا تۇركى مەملەكەتتەرى ۇيىمىنىڭ التى ەلى – تۇركيا، وزبەكستان، ازەربايجان، قىرعىزستان، ماجارستان جانە قازاقستان بالۋاندارى قاتىستى. سپورتشىلار جەتى سالماق ساناتىندا بەلدەستى: 55 كەلىگە دەيىن، 60 كەلىگە دەيىن، 66 كەلىگە دەيىن، 74 كەلىگە دەيىن، 82 كەلىگە دەيىن، 90 كەلىگە دەيىن جانە 90 كەلىدەن جوعارى سالماقتا.
ازيا كۋبوگىنىڭ فينالىنا قازاقستان مەن وزبەكستان كومانداسى شىقتى. قازاقستاندىق بالۋاندار وزبەك سپورتشىلارىن 4:3 ەسەبىمەن جەڭىپ، تۋرنير جەڭىمپازى اتاندى. اقتىق سىندا 90 كەلىدەن جوعارى سالماقتا قازاقستاندىق عالىمجان قىرىقباي وزبەكستاندىق مۋحسين حيسومۋددينوۆتى بەلدەسۋدە جەڭىپ، قازاقستان قۇراماسىنا جەڭىس اكەلدى. قىرعىزستان بالۋاندارى 4:3 ەسەبىمەن ازەربايجان كومانداسىن جەڭىپ، ءتۋرنيردىڭ 3-ورىن يەگەرلەرى اتاندى. جەڭىمپاز كوماندالارعا جۇلدە قورى تاعايىندالىپ، كۋبوك رەتىندە تۇركىستان سيمۆولى تايقازان بەرىلدى.
