پرەمەر-ءمينيستردىڭ ءبىرىنشى ورىنباسارى رومان سكليار باتىس قازاقستان وبلىسىنا ءىس-ساپارمەن كەلدى. رومان سكليار بقو اكىمى ناريمان تورەعاليەۆپەن بىرگە سۋ تاسقىنى بولعان اۋماقتاردى تىكۇشاقپەن ارالاپ، جاعدايدى ءوز كوزىمەن كوردى.
ۇكىمەت باسشىسىنىڭ ورىنباسارى كولەمى جاعىنان اۋقىمدى سۋ تاسقىنى بولعان تەرەكتى، سىرىم، قاراتوبە اۋداندارىنىڭ اۋماعىن كوردى. وبلىس اكىمى ناريمان تورەعاليەۆ تاسقىننىڭ الدىن الۋعا، حالىقتى قاۋىپسىز جەرگە كوشىرۋ باعىتىندا اتقارىلىپ جاتقان جۇمىستار جايلى ايتتى.
قازىرگى ۋاقىتتا وبلىستىڭ تەرەكتى، سىرىم، قاراتوبە، ءبورلى اۋداندارىندا، سونداي-اق، ورال قالاسىندا تاسقىنعا بايلانىستى تابيعي سيپاتتا توتەنشە جاعداي جاريالانعان. سۋ باسقان اۋماقتار كوپ مولشەردەگى جاۋىن-شاشىننىڭ سالدارىنان ۇلعايا تۇسكەن.
قازىرگى ۋاقىتتا تۇرعىنداردى قاۋىپسىز جەرگە كوشىرۋ جۇزەگە اسىرىلۋدا. 874 ادام ەۆاكۋاتسيالاندى.
باتىس قازاقستان وبلىسىندا سۋ تاسقىنى سالدارىن جويۋعا تجد جەكە قۇرامى، جەرگىلىكتى اتقارۋشى ورگاندار، قورعانىس مينيسترلىگى مەن قر ءىىم-ءنىڭ ماماندارى قاتىسۋدا. 306 بىرلىك تەحنيكا مەن 146 موتوپومپالار جۇمىلدىرىلدى.
سونداي-اق، ماڭعىستاۋ وبلىسىنىڭ جانە تجد اسكەري بولىمدەرىنىڭ كۇشتەرى تارتىلدى. قوسىمشا ۇقك شەكارا قىزمەتىنىڭ "مي-8" ەكى تىكۇشاعى جۇمىلدىرىلدى.
وڭىردە ارنايى كوميسسيا قۇرىلىپ، كەلتىرىلگەن زالال دى ەسەپتەۋ باستالدى. ر. سكليار بارلىق باعىتتار بويىنشا سۋ تاسقىنىنا قارسى جۇمىستاردى كۇشەيتۋدى تاپسىردى. ۇكىمەت تاراپىنان بارلىق قاجەتتى كومەك كورسەتىلەتىن بولادى.
