رەسەيدىڭ تەرگەۋ كوميتەتى كروكۋس سيتي حوللداعى تەراكتكە قاتىسى بار تاعى ءبىر كۇدىكتىنىڭ ۇستالعانىن مالىمدەدى، دەپ حابارلايدى «ادىرنا» ءتىلشىسى.
رەسەيلىك باق دەپارتامەنت توراعاسى الەكساندر باسترىكيننىڭ قاتىسۋىمەن وتكەن جەدەل كەڭەستە تەرگەۋگە قاتىستى تىڭ دەرەكتەر ايتىلعانىن جازدى. ماتەريالدا كۇدىكتىنىڭ اتى-ءجونى مەن ونىڭ ۇستالعان جەرى كورسەتىلمەگەن.
«ەر ادام لاڭكەستەردى «قارجىلاندىرۋعا» قاتىسقان دەگەن بولجام بار»،—دەلىنگەن حابارلامادا.
ەستەرىڭىزگە سالا كەتەيىك، 22 ناۋرىز كۇنى كەشكە رەسەيدىڭ كروكۋس سيتي حوللىندا بەلگىسىز بىرەۋلەر ءىرى تەراكت جاساعان بولاتىن. پرەزيدەنت قاسىم-جومارت توقاەۆ قازاقستان اتىنان ماسكەۋدەگى كروكۋس سيتي حوللداعى لاڭكەستىك ارەكەتتى قاتاڭ ايىپتادى. ۋكراينا لاڭكەستىك ارەكەتكە قاتىسى جوقتىعىن بىردەن ءمالىم ەتتى.
