«قايراق» اۆتوموبيل وتكىزۋ پۋنكتى ارقىلى رەسەيگە اسكەري شلەمدەر مەن تاكتيكالىق ريۋكزاكتاردى الىپ وتپەك بولعان كولىك جۇرگىزۋشىسى ۇستالدى. بۇل تۋرالى قوستاناي وبلىستىق مەملەكەتتىك كىرىستەر دەپارتامەنتىنىڭ ءباسپاسوز قىزمەتى مالىمدەدى دەپ حابارلايدى “ادىرنا” ۇلتتىق پورتالى.
«قوستاناي وبلىستىق مەملەكەتتىك كىرىستەر دەپارتامەنتى مەن ۇقك شەكارا قىزمەتىنىڭ بىرلەسكەن ارەكەتىمەن «گازەل» ماركالى كولىكتىڭ جۇك بولىگىنەن اسكەري شلەمدەر مەن تاكتيكالىق ريۋكزاكتار تابىلدى. تاسىمالداۋ مۇقابا تاۋارلارىن قولدانا وتىرىپ جۇزەگە اسىرىلعان. تاۋارلارعا ىلەسپە قۇجاتتامادا تاۋارلار تۋرالى مالىمەتتەر جوق. جۇگى بار كولىك وتكىزۋ پۋنكتىنىڭ اۋماعىندا بولادى. تاۋارلاردىڭ شىعۋ تەگىن جانە اكەتۋگە قاتىسى بار تۇلعالاردى انىقتاۋ بويىنشا شارالار قابىلدانادى»، - دەلىنگەن حابارلامادا.
دەپارتامەنت مالىمەتى بويىنشا، ءمان-جايلار انىقتالعان سوڭ، بۇل ارەكەتكە قاتىسى بار ادامدار جاۋاپقا تارتىلىپ، جۇك مەملەكەت پايداسىنا تاركىلەنەدى.
