رەسەيدىڭ قازاقستانداعى توتەنشە جانە وكىلەتتى ەلشىسى الەكسەي بوروداۆكين sputnik.kz تىلشىسىنە بەرگەن سۇحباتىندا قازاقستاندا ورىسفوبيا مەن ەكسترەميزمنىڭ دامىپ كەلە جاتقانىن ايتتى، دەپ حابارلايدى “ادىرنا” ۇلتتىق پورتالى.
ول قازاق قوعامىن ۇلتشىل جانە راديكالدى ۇراندار جاۋلاپ الدى دەپ ەسەپتەيدى.
“قازاقستانداعى ۇلتشىلدىق پەن راديكالدىق تەندەنتسيالاردىڭ بارعان سايىن ايقىن بايقالىپ جاتقانىنا وكىنىشپەن ايتا الامىن جانە الاڭدايمىن. ينتەرنەتتە راديكالدى ۇلتشىلدار مۇلدەم قابىلدانبايتىن تالاپتار، ۇراندار جانە ت.ب. ۇسىناتىن بەينەروليكتەرگە تولى. ونىڭ ۇستىنە بۇل ۇراندار رۋسوفوبتىق”، – دەدى ەلشى.
سونداي-اق، بوروداۆكين پرەزيدەنت توقاەۆتىڭ ۇلىقتاۋ ءراسىمى كەزىندە قوعامداعى الاۋىزدىققا جانە حالىق بىرلىگىنە نۇقسان كەلتىرۋگە باعىتتالعان ارانداتۋشىلىق ارەكەتتەردىڭ جولىن كەسەتىنىن جاريالاعانىن اتاپ ءوتتى. ول بۇدان بىلاي ەل باسشىلىعى قازاق قوعامىنداعى ۇلتشىلدىق پەن راديكالدىق سەزىمدى ازايتۋ شارالارىن قولعا الادى دەپ كۇتەدى.
“قايتالاپ ايتامىن، قازىر پرەزيدەنت بەرگەن كۇشتى مانداتپەن ەكسترەميستىك ۇلتشىلدىق سوزدەردىڭ بارلىق تۇرلەرىن اۋىزدىقتاۋعا باعىتتالعان قاتاڭ شارالار جۇزەگە اسىرىلادى. بىزدەن سۇراسا، كومەكتەسەمىز”، – دەدى ول.
بۇل رەتتە توتەنشە ەلشى قاڭتار وقيعاسى كەزىندە ۇقشۇ ارقىلى بىتىمگەرشىلىك كونتينگەنتىنىڭ ەنگىزىلۋى ەلدەگى ءتارتىپتى تەز ارادا قالپىنا كەلتىرۋگە كومەكتەسكەنىن ەسكە سالدى. ول قازاقستان حالقىنا وتە جىلدام ءارى ءتيىمدى كومەك ءۇشىن العىس بىلدىرەتىنىن اتاپ ءوتتى.
