تاشكەنت قالاسىنىڭ ميراباد اۋداندىق قىلمىستىق ىستەرى جونىندەگى سوتى «ساليمباي» نەمەسە «ساليمبويۆاچچا» دەگەن اتپەن تانىمال، ورتالىق ازيادا اتى شىققان كاسىپكەر ساليم ابدۋۆاليەۆتى التى جىلعا باس بوستاندىعىنان ايىردى. ۇكىم 19 ناۋرىزدا جاريالاندى، دەپ حابارلايدى “ادىرنا” ۇلتتىق پورتالى تاشكەنت سوتىنىڭ ءباسپاسوز قىزمەتىنىڭ Telegram-ارناسىنا سىلتەپ.
ءباسپاسوز قىزمەتىنىڭ حابارلاۋىنشا، ابدۋۆاليەۆ قىلمىستىق كودەكستىڭ 248-بابىنىڭ 2-بولىگى («اتىس قارۋىن، وق-دارىلەردى، اتىس قارۋىنىڭ نەگىزگى بولىكتەرىن، جارىلعىش زاتتاردى نەمەسە جارىلعىش قۇرىلعىلاردى زاڭسىز اينالىمى، بىرنەشە رەت نەمەسە قاۋىپتى قايتالاپ جاساعان قىلمىسى») بويىنشا كىنالى دەپ تانىلدى.
بۇل رەتتە كاسىپكەر قىلمىستىق كودەكستىڭ 246-بابىنىڭ 1-بولىگى («كونتراباندا») بويىنشا تاعى ءبىر ايىپ بويىنشا قىلمىستىق جاۋاپكەرشىلىكتەن بوساتىلدى. بۇل رەتتە، شەشىم قابىلداۋعا جاۋاپكەرشىلىككە تارتۋ مەرزىمىنىڭ ءوتىپ كەتۋى سەبەپ بولعان.
ۇكىمگە سايكەس، ابدۋۆاليەۆ جازاسىن جالپى رەجيمدەگى كولونيادا وتەيتىن بولادى.
73 جاستاعى ساليم ابدۋۆاليەۆتىڭ ۇستالعانى وتكەن جىلدىڭ جەلتوقسان ايىندا بەلگىلى بولدى. كاسىپكەرگە اتىس قارۋىن زاڭسىز ساقتاۋ بابى بويىنشا قىلمىس جاسادى دەگەن ايىپ تاعىلدى.
كەيىنىرەك تاشكەنت قالالىق ىشكى ىستەر باس باسقارماسى تەرگەۋ بارىسىندا ونىڭ قاماۋعا الىنعانىن حابارلادى. سونىمەن قاتار، تاعىلعان ايىپ قىلمىستىق كودەكستىڭ سول بابىنىڭ ءبىرىنشى بولىگىنەن ەكىنشى بولىگىنە قايتا سارالاندى. وسىلايشا، كاسىپكەر ايىپپۇلدىڭ ورنىنا ون جىلعا دەيىن باس بوستاندىعىنان ايىرىلدى.
ساليم ابدۋۆاليەۆ – ورتالىق ازيادا اتى شىققان مەتسەناتتاردىڭ ءبىرى. ول قىلمىستىق الەمنىڭ وكىلى بولىپ سانالادى، مىسالى، بىرنەشە جىل بۇرىن وزبەكستانداعى اقش ەلشىسى ديپلوماتيالىق حاتتارىندا ونى «وزبەك مافياسىنىڭ باسى» دەپ اتاعان.
