فۋتبولدان قازاقستان ۇلتتىق قۇراماسىنىڭ باس باپكەرى ماگومەد اديەۆ گرەكيادان جەڭىلگەننەن كەيىن جۋرناليستەردىڭ سۇراقتارىنا جاۋاپ بەردى، دەپ حابارلايدى «ادىرنا» ءتىلشىسى.
«حالىق ءبىزدى ۇنەمى ماقتاپ، قولداۋ ءبىلدىردى. ءدان رازىمىن. قازاقستان مەن ءۇشىن كوپ نارسە جاسادى. سىندى ۇلكەن قۇرمەتپەن قابىلدايمىن. جەڭىلىس ءۇشىن بارلىق جاۋاپكەرشىلىك ماعان جۇكتەلەدى. بۇگىن-اق وتستاۆكاعا كەتەر ەدىم. مەنى تەك فەدەراتسياعا دەگەن كوزقاراسىم ۇستاپ تۇر. مەن جايدان-جاي شەشىم قابىلداي المايمىن. كارت-بلانش سىنشىلاردىڭ قولىندا»، - دەدى ول.
باس باپكەر ويىننىڭ باسىندا قيىن جاعدايعا تاپ بولعانىن مالىمدەدى.
«العاشقى مينۋتتاردان قىسىم بولاتىنىن كوپ ايتتىق. وكىنىشكە قاراي، توتەپ بەرە المادىق. قارسىلاستارىمىز ەسەپ ايىرماسىن ۇلعايتا ءتۇسىپ، ويىنعا قايتا ورالۋىمىزعا مۇمكىندىك بەرمەدى»،—دەپ تولىقتىردى ماگومەد اديەۆ.
بۇعان دەيىن ول ءبىراز فۋتبولشىنىڭ ورازا ۇستاپ جۇرگەنىن ايتقان ەدى.
«ويىنشىلاردىڭ كوبىندە ورازا ۇستاۋدا تاجىريبەسى بار. سوندىقتان قيىندىق بولمايدى دەپ ويلايمىن. ءبىز بۇل جەردە بەلگىلى ءبىر تۇزەتۋلەردى جاسادىق، ول دۋبايداعى دايىندىق بولىمىنە قاتىستى ەدى. جىگىتتەر جاتتىعۋدان كەيىن سۋ ءىشىپ، بىردەن تاماقتانۋلارى ءۇشىن جاتتىعۋ پروتسەسىن ۇيىمداستىردىق»،—دەدى باپكەر.
ەسكە سالايىق، 21 ناۋرىزدا فۋتبولدان قازاقستان قۇراماسى ۇلتتار ليگاسى س جولى بويىنشا پلەي-وفف ساتىسى جارتىلاي فينالىندا گرەكيادان 0:5 ەسەبىمەن جەڭىلگەن ەدى.
