Futboldan Qazaqstan ūlttyq qūramasynyŋ bas bapkerı Magomed Adiev Grekiiadan jeŋılgennen keiın jurnalisterdıŋ sūraqtaryna jauap berdı, dep habarlaidy «Adyrna» tılşısı.
«Halyq bızdı ünemı maqtap, qoldau bıldırdı. Dän razymyn. Qazaqstan men üşın köp närse jasady. Syndy ülken qūrmetpen qabyldaimyn. Jeŋılıs üşın barlyq jauapkerşılık maǧan jükteledı. Bügın-aq otstavkaǧa keter edım. Menı tek federasiiaǧa degen közqarasym ūstap tūr. Men jaidan-jai şeşım qabyldai almaimyn. Kart-blanş synşylardyŋ qolynda», - dedı ol.
Bas bapker oiynnyŋ basynda qiyn jaǧdaiǧa tap bolǧanyn mälımdedı.
«Alǧaşqy minuttardan qysym bolatynyn köp aittyq. Ökınışke qarai, tötep bere almadyq. Qarsylastarymyz esep aiyrmasyn ūlǧaita tüsıp, oiynǧa qaita oraluymyzǧa mümkındık bermedı»,—dep tolyqtyrdy Magomed Adiev.
Būǧan deiın ol bıraz futbolşynyŋ oraza ūstap jürgenın aitqan edı.
«Oiynşylardyŋ köbınde oraza ūstauda täjıribesı bar. Sondyqtan qiyndyq bolmaidy dep oilaimyn. Bız būl jerde belgılı bır tüzetulerdı jasadyq, ol Dubaidaǧy daiyndyq bölımıne qatysty edı. Jıgıtter jattyǧudan keiın su ışıp, bırden tamaqtanulary üşın jattyǧu prosesın ūiymdastyrdyq»,—dedı bapker.
Eske salaiyq, 21 nauryzda futboldan Qazaqstan qūramasy Ūlttar ligasy S joly boiynşa plei-off satysy jartylai finalynda Grekiiadan 0:5 esebımen jeŋılgen edı.
