جامبىل وبلىسىنىڭ اكىمى ەربول قاراشوكەەۆ جاڭا فۋتبول اكادەمياسىنىڭ ىرگەتاسىنا كاپسۋلا سالۋ راسىمىنە قاتىسىپ، بۇل جوبانىڭ ءوڭىر سپورتى ءۇشىن ماڭىزىن اتاپ ءوتتى.
– بۇگىن – ءبىز ءۇشىن تاريحي ءارى قۋانىشتى كۇن. اۋليە-اتا جەرىندە جاڭا فۋتبول ءداۋىرىنىڭ باستالۋىن بىرگە اتاپ وتىرمىز.
سالىناتىن بۇل نىسان – تەك عيمارات قانا ەمەس، بولاشاق چەمپيونداردىڭ ورداسى، ەل نامىسىن الەمدىك ارەنالاردا ابىرويمەن قورعايتىن جاڭا بۋىن فۋتبولشىلاردىڭ جولىن اشاتىن ماڭىزدى قادام.
ءبىزدىڭ ءوڭىر – قازاق فۋتبولىنىڭ قاينار بۇلاعى. وسىندا ءوسىپ، تالاي جانكۇيەردىڭ جۇرەگىن جاۋلاعان داڭقتى سپورتشىلاردىڭ ەسىمى ءبىز ءۇشىن زور ماقتانىش، كەيىنگى تولقىنعا ۇلگى.
بۇگىن كاپسۋلانى سالتاناتتى تۇردە ورنالاستىرۋ – الدا كۇتكەن ۇلكەن جەتىستىكتەردىڭ نىشانى. بۇل اكادەميادان ەل سەنىمىن ارقالايتىن دارىندى، تالاپتى جاس فۋتبولشىلار ءوسىپ شىعاتىنىنا كامىل سەنەمىز.
جاڭا اكادەميا قازاق فۋتبولىنا تىڭ سەرپىن بەرىپ، ءبىزدى جاڭا بەلەستەرگە باستاي بەرسىن! – دەدى ەربول قاراشوكەەۆ.
قازاقستان فۋتبول فەدەراتسياسىنىڭ باس حاتشىسى داۆيد لوريا جانە «Halyk» قايىرىمدىلىق قورىنىڭ اتقارۋشى ديرەكتورى عالىمبەك جاقسىلىقوۆ جاڭا اكادەميانىڭ قازاق فۋتبولىن دامىتۋداعى رولىنە توقتالدى.
سونىمەن قاتار فۋتبول ارداگەرى گەورگي حۋتيدي مەن «تاراز» فۋتبول كلۋبىنىڭ تۇلەگى، بەلگىلى فۋتبولشى نۇركەن مازباەۆ جوبانى ىسكە اسىرۋعا اتسالىسىپ جۇرگەن ازاماتتارعا ءوز العىستارىن ءبىلدىردى.
قۇنى شامامەن 3,5 ملرد تەڭگەنى قۇرايتىن فۋتبول اكادەمياسىندا جاسوسپىرىمدەردىڭ كاسىبي ءوسۋى مەن دامۋىنا ەرەكشە نازار اۋدارىلادى. بۇل ءۇشىن زاماناۋي ماتەريالدىق بازا جاساقتالىپ، تاجىريبەلى جاتتىقتىرۋشىلار جۇمىس ىستەيدى، ال وقۋ-جاتتىعۋ پروتسەسىندە عىلىمي نەگىزدەلگەن ادىستەمەلەر قولدانىلماق.
جاس فۋتبولشىلاردىڭ جايلى ءومىر ءسۇرۋى ءۇشىن 100 ورىندىق جاتاقحانا سالۋ جوسپارلانىپ وتىر.
اكادەميا 2027 جىلى پايدالانۋعا بەرىلەدى دەپ كۇتىلۋدە.
ايتا كەتەيىك، جوبا قازاقستان فۋتبول فەدەراتسياسى، «Halyk» قايىرىمدىلىق قورى جانە جامبىل وبلىسى اكىمدىگى اراسىنداعى سەرىكتەستىك اياسىندا جۇزەگە اسىرىلۋدا.
