660 مىڭ قازاقستاندىقتى الاياقتار 2 ميلليارد تەڭگەدەن استام سوماعا الداعان، دەپ حابارلايدى "ادىرنا" ۇلتتىق پورتالى. بۇل تۋرالى قارجىلىق مونيتورينگ اگەنتتىگى مالىمدەدى.
«جاناشىر ازاماتتاردىڭ جاقسى نيەتى «جالعان» مۇقتاجدار ءۇشىن وڭاي تابىسقا اينالۋى مۇمكىن»، – دەپ ەسكەرتەدى ۆەدومستۆو.
جالپى جينالعان قارجى سوماسى 6 ملرد تەڭگەنى قۇرادى، ونىڭ 33% (2 ملرد) الاياقتىق بەلگىلەرى بار.
قما باسشىسى د. مالاحوۆ جوسىقسىز ازاماتتار "ەم" جانە "جاعدايى تومەن ادامدارعا كومەك كورسەتۋ" ءۇشىن قايىرىمدىلىق قىزمەتى مەن كومەك كورسەتۋ تۇرىندەگى قاراجات جيناۋدى كەدەرگىسىز جانە باقىلاۋسىز جۇزەگە اسىراتىنىن اتاپ ءوتتى. ياعني كۇدىكتىلەر الەۋمەتتىك جەلىدە «ەم» جانە «جاعدايى تومەن ادامدارعا كومەك كورسەتۋ» ءۇشىن اقشا سۇراعان.
ولار اقشانى جىلجىمالى جانە جىلجىمايتىن مۇلىكتى ساتىپ الۋعا، تۇرمىستىق شىعىندارعا، بۋكمەكەرلىك كەڭسەلەردە ءباس تىگۋگە جانە شەتەلدەگى قىمبات پاتەرلەردى جالعا الۋعا جۇمسايدى.
وتىرىسقا قاتىسۋشىلار – احقو، قارجى رەتتەۋشىلەرى جانە ەكىنشى دەڭگەيلى بانكتەردىڭ وكىلدەرى - كراۋدفاندينگتىك قىزمەتتى رەتتەۋ بويىنشا زاڭنامالىق شارالاردى ازىرلەۋ قاجەتتىگىن اتاپ ءوتتى.
