برازيليانىڭ فورموزا قالاسىنىڭ 69 جاستاعى تۇرعىنى ءوزىن يلون ماسك دەپ تانىستىرعان الاياققا سەنىپ، وعان 25 ميلليون تەڭگەگە جۋىق قاراجات اۋدارعان، دەپ حابارلايدى "ادىرنا" ۇلتتىق پورتالى DailyMail سايتىنا سىلتەمە جاساپ.
ايەل الەۋمەتتىك جەلى ارقىلى "ميللياردەرمەن" تانىسىپ، ونىمەن بىرنەشە اي بويى حات جازىسقان. ول الاياقتىڭ سوزىنە سەنىپ، ءتىپتى ونىڭ ءنومىرىن "مەنىڭ ماحابباتىم يلون" دەپ ساقتاپ قويعان.
ءبىرشاما ۋاقىتتان كەيىن ەر ادام وعان گۇلدەر مەن زەرگەرلىك بۇيىمدار جىبەرۋگە ۋادە بەرىپ، اقىرىندا اقشالاي كومەك سۇراي باستاعان. الدىمەن 172 جانە 517 دوللار، كەيىنىرەك 10 696 جانە 15 865 دوللار اۋدارۋعا كونگەن.
ايەل ءۇيىن كەپىلگە قويىپ، 86 مىڭ دوللار نەسيە الۋدى جوسپارلاپ جۇرگەن كەزدە، ونىڭ بالالارى كۇدىكتەنە باستادى. ولار اناسىن ساقتاندىرۋعا تىرىستى، بىراق ايەل "يلون ماسكتىڭ" ادالدىعىنا سەنىپ، اقشانى جىبەرۋدى جالعاستىردى.
الاياق وعان ءۇش كۇن ىشىندە 600 000 دوللار اۋداراتىنىن ايتىپ، سەندىرگەن. بىراق بالالارى ارالاسقاننان كەيىن ايەل بايلانىسىن ءۇزدى.
قازىرگى ۋاقىتتا قۇقىق قورعاۋ ورگاندارى قىلمىسكەردى ىزدەۋدە.
