قۇرىلتايدان كەيىن توقاەۆ اۋىزاشار بەرىپ، قازاقستاندا دەسترۋكتيۆتى اعىمداردىڭ بارىنا الاڭدايتىنىن ايتتى، دەپ حابارلايدى "ادىرنا" ءتىلشىسى.
سىرىم يتقۇلوۆ Telegram جەلىسىندەگى ارناسىندا ءدىن ماسەلەسىنىڭ بۇگىندە ءورشىپ تۇرعانىن جازدى.
"اسحات نيازوۆتىڭ جۋىردا سارىاعاش تۋرالى جاريالاعان اقپاراتى وسى تاقىرىپقا قاتىستى. ول جەرگىلىكتى قاريا "جاستارىمىزدىڭ بارلىعى مەشىتتەردە بۇزىلىپ جاتىر" دەگەنىن ايتقان ەدى.
ونىڭ سوزىنشە، قالاداعى بالالاردىڭ 50 پايىزعا جۋىعىن مولدالار دىنگە تارتىپ العان. ونىڭ ۇستىنە، ولاردىڭ اراسىندا ءبىلىم الۋدان باس تارتىپ جۇرگەن 5-6 جاستاعى مەكتەپ جاسىنا دەيىنگى بالالار دا بار. ول بالالاردىڭ عالىم، مۇعالىم بولۋى مۇمكىن ەكەنىن، بىراق جەرگىلىكتى يمامدار ولاردى باسقا باعىتقا بۇرىپ جاتقانىن ايتادى. ال تۇرعىندار يمامدارعا سىن ايتىپ، پىكىرلەرىن بىلدىرسە دە ەلەمەگەن", - دەلىنگەن حابارلامادا.
"وبوجايۋ" تەلەگرام ارناسىندا جاريالانعان سۇحباتتان ۇزىندىدە سارىاعاشتىق قاريا پرەزيدەنتكە ەلدەگى بارلىق دەسترۋكتيۆتى ۇردىستەردى شەكتەۋ كەرەكتىگىن، جالپى بالالارعا ساقال قويۋعا تىيىم سالۋ كەرەكتىگىن، ءتيىستى ۇزىندىقتاعى شالبار كيۋدى مىندەتتەۋدى سۇرادى.
كۇنى-كەشە اتىراۋدا وتكەن 3-ءشى قۇرىلتايدا پرەزيدەنت داستۇرىمىزگە جات ءدىني نانىم-سەنىم مەن مادەنيەتكە قاتىستى ءبىرشاما ماسەلەگە توقتاپ، ناسيحاتتاۋشىلاردىڭ جەتەگىنە ەرمەۋ كەرەگىن ايتتى.
"تارازى باسىندا وسكەلەڭ ۇرپاقتىڭ رۋحاني جاعىنان ساۋ-سالاماتتى بولۋ ماسەلەسى تۇر.
ءبىز حالقىمىزدىڭ رۋحاني نەگىزىن قۇرمەتتەي وتىرىپ، مەملەكەتىمىزدىڭ زايىرلى ەل رەتىندەگى مارتەبەسىن كۇشەيتە ءتۇسۋىمىز كەرەك. قازاقستان ءوزىنىڭ مەملەكەتتىلىگىنە جانە قوعامدىق مورالىنا قايشى كەلمەيتىن ءدىني نانىم-سەنىمدەردىڭ، ءتۇرلى تانىمدار مەن ىلىمدەردىڭ بارىنە تۇسىنىستىكپەن قارايدى. بىراق ءبىز باتىستىڭ، يا بولماسا باسقا دا كوزقاراس يەلەرىنىڭ ىقپالىمەن ءتول مادەنيەتىمىزگە جات ءارى الەمنىڭ دۋاليستىك نەگىزىنە كەرەعار قۇندىلىقتاردى ناسيحاتتاۋشىلاردىڭ جەتەگىنە ەرىپ كەتە المايمىز، كەتپەيمىز دە!", - دەدى پرەزيدەنت.
مەملەكەت باسشىسى سوزىندە، دەسترۋكتيۆتى ناسيحاتتارعا ءبىزدىڭ ەلىمىزدەگى بالالار دا ىلەسىپ كەتىپ جۇرگەنىن ايتتى.
"اشىق ايتساق، ءدىن ماسەلەسى – ۇلتتىق قاۋىپسىزدىك ماسەلەسى. جاستاردىڭ ساناسىن شەتەلدەن كەلگەن ءتۇرلى اعىمدارمەن ۋلاۋعا بولمايدى", - دەدى پرەزيدەنت.
مەملەكەت باسشىسى ءورشىپ تۇرعان ءدىن ماسەلەسىن شەشۋ جولىندا قازاقستان مۇسىلماندارى ءدىني باسقارماسى ۇلكەن ءرول اتقاراتىنىن اتاپ، جاستارعا دۇرىس باعىت-باعدار بەرۋدى "اسا ماڭىزدى مىندەت" دەپ تانىدى.
