تۇركىستان وبلىسىندا ءۇش كۇن بۇرىن جوعالعان قىزدىڭ ءمايىتى تابىلدى، دەپ حابارلايدى "ادىرنا" ۇلتتىق پورتالى.
ءۇش جاستاعى ءبۇلدىرشىن سارىاعاش اۋدانىندا ءىز-ءتۇسسىز جوعالعان ەدى. كىشكەنتاي اسىلىمنىڭ ءىزىم-قايىم جوعالعانىن جۋرناليست گۇلميرا ابىقاي مالىمدەگەن بولاتىن. 18 مامىر كۇنى جۋرناليست قىزدىڭ ءولى تابىلعانىن جازدى.
دەرەكتەرگە ساي وقيعا سارىاعاش اۋدانى سىرگەلى اۋىلىندا ورىن العان. ءبۇلدىرشىن تاڭعى استى ءىشىپ بولعان سوڭ جوعالعان. كەيىن قىزدى اۋىل بولىپ ءۇش كۇن بويى ىزدەگەن. سىرگەلىدەگى بارلىق قۇدىق، دارەتحانا، قۇبىرلار سورعىزىلىپ قارالعان. بىراق ءۇش جاسار ءبۇلدىرشىننىڭ دەنەسى قاراما-قارسى كورشى ءۇيدىڭ دارەتحاناسىنان تابىلدى.
“بۇكىل ەل ۋايىمداپ، ءدىن-امان تابىلۋىنا تىلەكشى بولىپ ەدىك. اتتەڭ عاجايىپ بولمادى. قايعى جۇتقان اسىلىمنىڭ اتا-اناسىنا، تۋىستارىنا، بارشا قازاق ەلىنە كوڭىل ايتامىن. جاتقان جەرىڭ پەيىش بولسىن، پەرىشتە. اياعى شىققان، بىراق ەس بىلمەيتىن بالالارىڭىزدى كوزدەن تاسا قالدىرماڭىزشى، حالايىق”،- دەدى گۇلميرا ابىقاي ينستا-پاراقشاسىندا.
