تارازداعى مەكتەپتە جارىلىس بولىپ، ءۇش ادام 3-قاباتتان سەكىرىپ كەتكەن. جەتى ادام اۋرۋحاناعا جەتكىزىلدى، ونىڭ ەكەۋى قازىر جانساقتاۋ بولىمىندە جاتىر. بۇل تۋرالى Astana تەلەارناسى جاريالادى، دەپ حابارلايدى “ادىرنا” ۇلتتىق پورتالى.
اقپاراتقا سۇيەنسەك، وقيعا 17 قىركۇيەك كۇنى تۇنگى ساعات 12 جارىمدا بولعان. ونى جەرگىلىكتى بيلىك جاسىرىپ قالعىسى كەلگەنگە ۇقسايدى. قازىر ءورتتىڭ نەدەن تۇتانعانى انىقتالۋدا.
- ءورت بولعان كۇنى ايماق باسشىلىعى اۋرۋحاناعا بارىپ، جاراقات العاندارعا جاقىن ارادا اياققا تۇرعىزۋعا كومەگىمىزدى ايامايمىز دەپ ۋادە بەرىپتى. بىراق ودان كەيىن حابارلاسپاعان. وسى كۇنگە دەيىن ەشقانداي كومەك جوق. وبلىستىق اكىمدىك كەلىپ، جاقسىلاپ كومەكتەسەمىز، اياقتان تۇرعىزامىز دەگەن. ءالى ەشقانداي كومەك بوپ جاتقان جوق قىزداردىڭ جاعدايلارى قالاي بولادى ەندى مۇگەدەك تە بولىپ قالۋى مۇمكىن عوي، - دەيدى قالا تۇرعىنى گۇلجان سادىقۇلوۆا .
تاعى ءبىر قالا تۇرعىنىنىڭ ايتۋىنشا، استانادان كەلەتىن مامان وتا جاساۋدان باس تارتىپتى.
- ەرتەرەك وپەراتسياسىن جاساسا. مىنە بۇگىن ءۇشىنشىشى كۇن بولدى عوي، ءبىز ءالى ءجۇرمىز وسى جەردە. ءالى استانادان كەلەدى، مىنە جاسايدى، مىنە كەلەدى، مىنە كەلە جاتىر بىراق جوق حابار. ال ەندى قازىر ايتىپ تۇر استانا وتكاز بەردى دەپ، - دەيدى ول.
تاراز قالاسىندا جەتى مەكتەپ جاڭا وقۋ جىلىندا بىتپەي قالعان ەدى. قۇرىلىسى كەشىككەن مەكتەپتەردىڭ ءبىرى وسى. مەردىگەر جوندەۋدى تەز ءبىتىرۋى ءۇشىن ەكى اۋىسىمدا جۇمىس ىستەتكەن. بۇل مەكتەپتىڭ 1021 وقۋشىسى ماڭايداعى 3 مەكتەپكە ءبولىنىپ وقۋدا. ال ءبىلىم ورداسىندا بولعان جارىلىستان بارلىعى 7 ادام زارداپ شەككەن. ونىڭ ۇشەۋى جەڭىل جاراقات السا، تاعى 2-ءىن كۇيىك شالعان. ال ءۇشىنشى قاباتتان سەكىرىپ كەتكەن ەكى قۇرىلىسشى قىز جانساقتاۋ بولىمىندە جاتىر، - دەيدى ساليما نارىمبەتوۆا.
ال قالالىق №1 اۋرۋحانا باس دارىگەرىنىڭ ورىنباسارى ساكەن جۇماشەۆ قالا اكىمدىگىنە ارقا سۇيەۋدە:
- قابىرعالارى سىنعان، ومىرتقالارى سىنعان جانە ءبىر اياعى سىنعان. سوندىقتان قازىر ونى جىلجىتىپ استاناعا سامولەتكە سالىپ جىبەرۋگە بولمايدى. سول جاقتىڭ سپەتسياليستتەرى كەلىپ وسىندا وپەراتسيا جاساماقشى.
قالا اكىمى ەشكىم جاۋاپكەرشىلىكتەن قاشىپ جاتقان جوقتىعىن ايتىپ، بارلىعى كومەك كورسەتىلەدى دەپ وتىر.
تاراز قالاسىنىڭ اكىمى باقىتجان ورىنبەكوۆ زارداپ شەككەندەرگە مەردىگەر كومەكتەسەتىنىن ايتتى.
- مەردىگەر جاۋاپكەرشىلىكتەن قاشىپ وتىرعان جوق. زارداپ شەككەن ازاماتتارعا تولىق كومەك كورسەتۋگە دايىن. قىزدار ەمىن قابىلداپ جاتىر. دارىمەن باسقا نارسەمەن قامتاماسىز ەتىلگەن. بولاشاقتا رەبليتاتسيا قاجەت بولاتىن بولسا مەردىگەر ءوز تاراپىنان سول ماسەلەنى شەشۋگە دايىن ەكەنىن ايتتى. ءورت قاۋىپسىزدىگىن قامتاماسىز ەتپەگەن دەپ تانىلىپ، قازىر قىلمىستىق ءىس اشىلدى. ازىرگە ءورتتىڭ نەدەن تۇتانعانى بەلگىسىز. تەك جارىلىستىڭ بوياۋ قۇتىسىنان شىققان دەگەن بولجام بار، - دەدى اكىم.
