Quryltaıdan keıin Toqaev aýyzashar berip, Qazaqstanda destrýktıvti aǵymdardyń baryna alańdaıtynyn aıtty, dep habarlaıdy "Adyrna" tilshisi.
Syrym Itqulov Telegram jelisindegi arnasynda din máselesiniń búginde órship turǵanyn jazdy.
"Ashat Nııazovtyń jýyrda Saryaǵash týraly jarııalaǵan aqparaty osy taqyrypqa qatysty. Ol jergilikti qarııa "jastarymyzdyń barlyǵy meshitterde buzylyp jatyr" degenin aıtqan edi.
Onyń sózinshe, qaladaǵy balalardyń 50 paıyzǵa jýyǵyn moldalar dinge tartyp alǵan. Onyń ústine, olardyń arasynda bilim alýdan bas tartyp júrgen 5-6 jastaǵy mektep jasyna deıingi balalar da bar. Ol balalardyń ǵalym, muǵalim bolýy múmkin ekenin, biraq jergilikti ımamdar olardy basqa baǵytqa buryp jatqanyn aıtady. Al turǵyndar ımamdarǵa syn aıtyp, pikirlerin bildirse de elemegen", - delingen habarlamada.
"Obojaıý" telegram arnasynda jarııalanǵan suhbattan úzindide Saryaǵashtyq qarııa Prezıdentke eldegi barlyq destrýktıvti úrdisterdi shekteý kerektigin, jalpy balalarǵa saqal qoıýǵa tyıym salý kerektigin, tıisti uzyndyqtaǵy shalbar kııýdi mindetteýdi surady.
Kúni-keshe Atyraýda ótken 3-shi quryltaıda Prezıdent dástúrimizge jat dinı nanym-senim men mádenıetke qatysty birshama máselege toqtap, nasıhattaýshylardyń jetegine ermeý keregin aıtty.
"Tarazy basynda óskeleń urpaqtyń rýhanı jaǵynan saý-salamatty bolý máselesi tur.
Biz halqymyzdyń rýhanı negizin qurmetteı otyryp, memleketimizdiń zaıyrly el retindegi mártebesin kúsheıte túsýimiz kerek. Qazaqstan óziniń memlekettiligine jáne qoǵamdyq moralyna qaıshy kelmeıtin dinı nanym-senimderdiń, túrli tanymdar men ilimderdiń bárine túsinistikpen qaraıdy. Biraq biz batystyń, ıa bolmasa basqa da kózqaras ıeleriniń yqpalymen tól mádenıetimizge jat ári álemniń dýalıstik negizine kereǵar qundylyqtardy nasıhattaýshylardyń jetegine erip kete almaımyz, ketpeımiz de!", - dedi Prezıdent.
Memleket basshysy sózinde, destrýktıvti nasıhattarǵa bizdiń elimizdegi balalar da ilesip ketip júrgenin aıtty.
"Ashyq aıtsaq, din máselesi – ulttyq qaýipsizdik máselesi. Jastardyń sanasyn shetelden kelgen túrli aǵymdarmen ýlaýǵa bolmaıdy", - dedi Prezıdent.
Memleket basshysy órship turǵan din máselesin sheshý jolynda Qazaqstan musylmandary dinı basqarmasy úlken ról atqaratynyn atap, jastarǵa durys baǵyt-baǵdar berýdi "asa mańyzdy mindet" dep tanydy.
